Calvert-Lewin-a'n goal a khung chhunzawm

Dominic Calvert-Lewin goal hnih hmangin Everton-in Craven Cottage-ah Fulham 3-2 in an hneh. Carlo Ancelotti hoten league match li chhung chak hmel an hmuh loh hnuah point thum an hlawh chhuak.

Pathianni zan inkhelah hian Toffees tan second 41-na lekah Calvert-Lewin-a'n Richarlison siamsak chu a khung a, tun season-a goal rang ber a ni. Fulham-in Bobby De Cordova-Reid hmangin minute 15-naah an sut.

Amaherawhchu Calvert-Lewin bawkin minute 29-naah a khung a, English striker siamsaktu Lucas Digne hian minute 35-naah Abdoulaye Doucoure goal khung tur a siam leh bawk.

Toffees hi awlsam taka chak tura an lan hnuah Ruben Loftus-Cheek-a'n minute 70-naah Fulham tan a khung a, hun tawp thlengin inkhel boruak a nung hle. 

Premier League-ah Calvert-Lewin-a'n goal 10 a khung tawh a, Son Heung-Min aia goal khata khung tamin top scorer a ni mek. Inkhelh banah Everton coach Carlo Ancelotti chuan,  "A khel ṭha em em a, dik taka sawi chuan hetianga a khelh ṭhat hi ka beisei lo. Golden Boot dawng tur chuan goal tam tak a khung a ngai a, club tan pawh a ṭha. Hei hi a tum a ni lo a, a dawng thei ang em, tih pawh ka sawi thei lo," tiin a sawi.