Aizawl FC tan hun ṭha inherchhuak dawn?

Mc Dowell's No. 1 Soda Mizoram Premier League Season 7 khelh nan ni thum chiah a awm tawh a, Aizawl FC chuan vawiin tlai dar 5:00 hian Barabati Stadium, Cuttack-ah Indian Arrows an hmachhawn dawn.

I League inelna neih mekah Mizo club an che ṭha tawk lo a, table mawngphaha awm club an hmachhawn hi an tan insiamṭhatna hun ṭha tiin a sawi theih a. Chutihrualin India ram rawlthar ṭha rual awmkhawmna Indian Arrows hian hnehna an chang a nih chuan AFC hi an lehthal thei ang.

Tute nge Arrows?
Indian Arrows player tam zawk hi FIFA World Cup Under 17-a ram aiawha khel te kha an ni hlawm a, Mizo rawlthar Lalengmawia pawh a tel a ni.

Season liam ta khan Portuguese coach Luís Norton de Matos hoin I League-ah hian an inlan tawh a, table mawngphaha awmin season an khar. Hemi ṭum hian an mualah Aizawl FC chu chelhin 2-2 in an inhnehtawk a, Mizoramah erawh 3-0 in an tlawm thung.

Tun ṭumah hian Arrows hi Floyd Pinto-a'n a enkawl a, Indian coach hian AIFF junior team hruaiin I Day Football khelin Mizoramah ṭum hnih a rawn kal tawh a. Mizo naupang engemaw zat a enkawl tawh bawk avangin Mizo player-te khelh dan hmang a hrechiang ang.

Hun ṭha chu
Aizawl FC tan hun ṭha a tih theih rualin Indian Arrows tan a ṭha mah zawk. Pinto hote hian kar liam ta Zirtawpni khan Manipur-ah Neroca 4-0 in an hneh lo a, hemi hnu hian hahdamna hun ṭha an neih avangin Mizo club hmachhawn tur tawpin inbuatsaihna an kalpui thei a ni.

Arrows coach Floyd Pinto chuan, "Kan inkhelh hnuhnung ber kan thlir chuan tihsual tam tak kan nei a, a bik takin tlarhnung chetsual vangin goal ho lam tak tak kan chhuah. Aizawl FC nen hian tlarhnung siam ṭhat hi kan tih hmasak tur a ni a, chu bakah chuan table kan thlir a nih chuan kan inthlauhna hi a tam lo. Inkhelh zawhah an chungah kan awm thei a, chu chuan phurna nasa tak min pe a ni," tiin a sawi.

Vanneih hun
Aizawl FC-in Real Kashmir an hneh loh hnuah Churchill Brothers an tlawh lehnghal a, Goan club lakah 4-1 zetin an tlawm. Gift Raikhan-a tan pawh tlarhnung siam ṭhat chu a hna ber a ni dawn a, Churchill nena mualpho Alfred Kemah Jaryan chu defence laiah a hmang chhunzawm zel dawn em tih hriat a châkawm hle.

Mizo club coach Gift chuan, "Zep loah chuan match zawna kan chak loh avangin kan hnual ve a, amaherawhchu hei hi football chu a ni a, hun harsa hi kan paltlang ve a ṭul a ni," tiin a sawi.

An khingpui tur chungchang sawiin Gift chuan, "Indian Arrows player-te hi naupang tak tak ni mah se an season hnihna a nih tawh avangin tawnhriat a nei ṭha a, khelh an harsa dawn. Chutihrualin keini pawhin chak kan mamawh a, theihna sang tak kan nei a, Mizo mipui beiseina leh kan theihna anga kan khelh chhuah ve a ṭul a ni," tiin awlsam taka point hmuhna tur a nih loh thu a sawi.