Futsal thiam ber Chhinga Veng

Vakiria Collection MFA Futsal Cup 2018 chu nimin khan RG Stadium-ah khelh zawh a ni a, nomawi inchuhna inkhelah Chhinga Veng chuan Electric Veng chu 6-5 a hnehin an champion.

Chhinga Veng tan hian MS Dawngliana, Lalsawmzela leh Lalruatfela ten goal hnih ṭheuh an khung a, Dawngtea leh Sawmzela hi Mizoram Premier League champion lai Chhingcows tan pawh player pawimawh an ni. Pahnihna Electric Veng pawh hian MPL club an nei a, Jacob Lalrawngbawla chuan hattrick a siam a, Ramhlunchhunga chuan goal hnih a khung ve bawk. Midfielder Jacob-a hi MPL-ah chuan Chhinga Veng FC player a ni.

Chhinga Veng futsal club hi Lalremruata'n a enkawl a, ani hi MPL-ah assistant coach hna chelhin Aizawl DFA hnuai first division-ah Kanan FC chu final a thlen pui a, tualchhung football-ah sulhnu a nei ṭha hle.

Inelna hi MFA Futsal Committee hnuaia club awmte tana buatsaih a ni a, team 40 an inel. Chhinga Veng hian semifinal-ah Futsal Club, Ramhlun Venglai an hneh a, Electric Veng hian Team Gideon an hneh thung a ni.

Lawmman
Champion Chhinga Veng Rs 20,000/- + Trophy
Pahnihna Electric Veng Rs10,000
Semifinalist Team Gideon & RVL Rs, 5,000/-
Best Player MS Dawngliana Rs 1,000/- Trophy,