Club lian tlawm zanah City an chak Foden hi England tan lunghlu a ni - Pep

Champions League group match hnuhnung berah Bayern Munich-in chak hmel hmu lo a, Real Madrid, Juventus, Manchester United leh Roma te an tlawm laiin Manchester City erawhin Hoffenheim 2-1 in an hneh.

Pep Guardiola hote hi group F hmahruaitu nichungin last 16 an lut a, inkhel dangah Shakhtar Donetsk leh Lyon te 1-1 a inhnehtawkin French club-in knockout stage an lut ve bawk.

Inhliam an tam

Manchester City-in Kevin de Bruyne, Sergio Aguero, David Silva, Benjamin Mendy leh Fernandinho te hliam vangin an chhawr thei lo a, player ṭha rual chhawr theih loh hi eng team tan pawh buaina tham a tling.

Hoffenheim an hmachhawn ṭum hian kum 30 mi Nicolas Otamendi awm mah se naupang rualin inkhel bul an ṭan a tih theih a, kum chawhrual chu kum 24 leh ni 95 a ni a. Tun ṭum hi Champions League-a Manchester United-in December 2012 a CFR Cluj (24y 54d) an hmachhawn hnua English club kum chawhruala an naupan ber ṭum a ni.

An lehthal

Hoffenheim-in City tan harsatna an siam a, Andrej Kramaric chu City tlarhnung tan a hnawksak nghal. French defender Aymeric Laporte-a'n Benjamin Hubner laka penalty a chawi avangin mikhual lam tan Kramaric-a'n minute 16-naah goal hmahruai a khung.

City-in an nawr let a, Gabriel Jesus leh Otamendi te goal hmaa an hlauhawm hnuah Sane chuan first half tawp hma hretin freekick aṭangin goal mawi a khung.

Second half-ah pawh City tan Sane bawkin goal a khung a, German forward hian Raheem Sterling nen an inthlawp hnuah minute 61-naah goal hnihna leh chakna goal a khung.

An fak Foden

India ramin FIFA World Cup Under 17 a thlen ṭuma best player Phil Foden pawh a khel tluan a, English midfielder hi player hmuhnawm a ni.

Inkhelh banah City manager Pep Guardiola chuan, "Foden chungah hian rinhlelhna ka nei ngai lo a, minute 90 chhung khan a hmuhnawm em em a ni. A hmel en mai chuan a chawrche hmel a, amaherawhchu a chak hle. Amahah hian theihna sang tak a awm a, England tan lunghlu a ni," tiin a fak.

Pep Guardiola hian Champions League season 10 a hmachhawn tawhah ṭum kua chu group hmahruaitu nichungin knockout stage a lut a, record a nei ṭha hle.