Bayern leh Ajax inhnehtawk

Goal ruk a luh bakah player pahnih hnawhchhuah an ni a, Nilaini zan Champions League inkhel boruak a sang hle. Inkhel hmuhnawm takah Bayern Munich chu Ajax nen 3-3 in an inhnehtawk a, team pahnih hi group E aṭangin an tlang.

German champion hian match ruk khelh aṭanga point 14 hmuin hmahruaitu an ni a, an hnuai chiahah hian point 12 hmutu Ajax an awm. Pathumna Benfica chuan Europa League an khel dawn a, a hnuai bera awm AEK Athens chuan point an hmu ve miah lo.

A pawimawh

Bayern Munich leh Ajax te hi an inkhelh hmain an tlang chiang tawh a, mahse hmahruaitu tur zawk a la chiang lo. Last 16-ah group hmahruaitu hian group danga pahnihna an hmachhawn ṭhin a, pahnihna hian team ṭha zawka ngaih an hmachhawn ṭhin - hei vang hian team pahnih tan chak a pawimawh.

Amsterdam-ah mikhual Bayern striker Robert Lewan­dowski-a'n minute 13-na leka goal hmahruai a khung chu Ajax lamin second half minute 61-naah Dusan Tadic hmangin an sut hram a, goal an khung aṭanga minute ruk hnu lekah defender Maximilian Wober chu hnawhchhuah a ni.

Boruak a hot

Player pakhata an tam zawk hnuah Bayern Munich dinhmun a ṭha zawka ngaih a ni. Mahse, Thomas Muller chuan ball kang sang lak a tumna lamah a ke a lek sang deuh a, Ajax defender Nicolas Tagliafico lu-ah a tlawh avangin hnawhchhuah a ni zui ve nghal.

Jerome Boateng-a penalty chawi chu Tadic-a'n khungin minute riat chauh a awm tawh tihin hma an hruai let. Mahse, hun a la tawp lo deuh, Poland international Lewandowski chuan penalty aṭang thoin an siphurh a sut let a, minute 90-naah Kingsley Coman chuan an goal thumna a khung zui bawk.

Hun a la tawp mai lo, Ajax lamin freekick aṭanga ball kal chhawr ṭangkaiin Real Madrid striker hlui Klaas-Jan Huntelaar chuan Nicolas Tagliafico goal khung tur a siamsak a, an siphurh an sut zo ve thung - goal dang luh belh nan hun a awm tawh lo.

Kovac thukhawchang

Bayern Munich coach Niko Kovac chuan Ajax nen an inkhelh chu hriatreng tlak a nih thu a sawi a, chutih rualin an goal chhuah danah an khingpuite chu offside nia a hriat thu leh red card chu phawrh awm tak a nih thu a sawi.

Kovac chuan, "Maximilian Wober leh Thomas Muller te hnawhchhuah danah referee Clement Turpin khan thutlukna dik a siam, goal kan chhuah danah erawh hmaih an nei niin ka hmu.

"Ka ngaihdan chuan football hmuhnawm zia kan lan chhuah tir a, goal kan khungte kha kan en chuan kan thiam leh thawhrim vang a ni tih a lang chiang. Kan striker khan a hna a tlin a, a hunah tak mamawh chhanna a ni thei zel," tiin a sawi.

Kum 30 mi Lewandowski hian tun season Champions League bikah goal riat khung tawhin ani aia khung hnem an awm lo, Poland international hian a vawi ruk nan Bayern hi European nomawi a chawipui thei ang em tih chu hunin a la hril ang.