Sameer Verma tan beiseina a la awm

India tlangval badminton khel thiam Sameer Verma chuan BWF World Tour Finals khelh mekah knock out round lut turin beiseina a nei thar leh ta, nimin group match inkhelah Indonesian tlangval Tommy Sugiarto chu straight game in a hneh.

World number 14 Sameer hian thla hmasa mai khan Syed Modi International nomawi a kawl lai a humhim a, player ṭha ṭhenkhat an inlan theih loh avangin BWF World Tour Finals hi a khelh theih phah, nimin inkhelah hian 21-16, 21-7 in hnehna a chang a ni.

Kum 24 mi Sameer hian a match hmasa zawkah world number 1 leh champion lai ni bawk Kento Momota a ngam lo, tun ṭumah hian chak lo nawn chu ni se a tan group stage paltlang theih a ni lo ang. A match hnuhnung berah Kantaphon Wangcharoen a hneh thei a nih chuan a tlang ang.

Thailand shuttler Kantaphon Wangcharoen leh Sameer te hi tun hmain vawi hnih an intawng tawh a, ṭum khat ve ve an chak. Swiss Open-ah Sameer-a'n hnehna a chan laiin Thailand Open-ah erawh a tlawm zawkah a ṭang.