Mualpho chunga group hmahruaitu Real Madrid

Champions League group stage-a an match hnuhnung berah Real Madrid chu 0-3 ngawtin mualpho mah se match hmasa lama an result-in a 'pui' a, group hmahruaitu nichungin last 16 an lut.

Russian club tan Fedor Chalov, Georgy Schennikov leh Arnor Sigurdsson ten goal khat ṭheuh an khung a, Real-in a chhanletna tur an nei lo.

European champion ni lai tan Europe inelnaa mahni khel­muala an tlawm chian ber ṭum a ni a, kum kaw hnua mahni khel­muala Champions League match-a an chak loh hmasak ber a ni bawk.

Minute 90 a zawh rualin Real fan-ten an player-te an au el a, season thum chhung zet Champions League-a a zawna champion tawh Real fan-ten an player-te khelh dan an hrethiam lo.

Bul ṭan ṭha

Real-in CSKA Moscow an mikhual hmain last 16 an lut chiang tawh a, hei vang hian coach Santiago Solari chuan starting XI tam zawk a chawlh hahdamtir a, Thibaut Courtois, Marcelo, Isco leh Karim Benzema te erawhin inkhel bul an ṭan tho.

Spanish club-in mahni mualah bul an ṭan ṭha zawk a, Marco Asensio chuan CSKA keeper Igor Akinfeev tan vawi thum ngawt hna a siamsak a, Brazilian rawlthar duhawm Vinicius Jr. leh Federico Valverde-te chu ṭha zetin a dang bawk.

Mahse maw...

Real-in bul ṭan ṭha mah se CSKA tan Chalov-a'n goal hmahruai a khung hnuah an tho leh tawh lo a, mikhual team tan Schennikov leh Iceland rawlthar Sigurdsson-ten an khung ve leh bawk - CSKA-in tun Champions League-ah match hnihah chiah hnehna an chang a, an hneh hi Real Madrid ve ve a ni!

Real Madrid hian Santiago Bernabeu-ah October 2009 khan AC Milan chu 2-3 in an ngam lo a, tun hi Milan laka an tlawm hnua Europe-a mahni muala an tlawm leh hmasak ber a ni - Real boss Solari-a'n match 10 a kaihhruaiah vawi hnih a tlawmna a ni a, Eibar lakah 3-0 in an lo tlawm tawh bawk.

Roma pawh

Nilaini zan inkhelh hmain Real group aṭangin anmahni ang thoin Roma chu last 16 lut chiang tawh an ni a, Real tlawm zanah Italian club hi an chak bik tlat lo - an mikhualna ramah Viktoria Plzen chu 2-1 in an ngam lo a, an group-ah pahnihna an ni.

Czech Republic club tan hian Jan Kovarik chuan goal hmahruai a khung a, minute nga hnu lawkah Cengiz Under chuan sut mah se mualneitu team tan Tomas Chory chuan chakna goal a khung - Roma tan defender Luca Pellegrini chu a yellow card pahnihna a hmuh avangin injury time-ah hnawhchhuah a ni a, Roma-in kim loin inkhel an khar.

Roma-in hnehna an chan zawh loh avangin an dinhmun a danglam phah lo a, hnehna changtu Viktoria erawhin Euro­pa League round of 32 an khelh phah dawn thung.