MPL7 top scorer tur a la chiang lo!

Mc Dowell's No. 1 Soda Mizoram Premier League Season 7-ah final khelh tur a la awm a, top scorer tur rin thiam a la harsa hle. Chhinga Veng forward MS Dawngliana chuan goal riat a khung tawh a, Mizoram Police forward Lalfakzuala goal khung zat nen a inang chiah a, final zawhah top scorer tur a hriat chauh dawn.

Thawnthu hlui

MPL5 khelh hmain hetih hunlaia Chanmari forward Malsawmfela leh Chanmari West forward Laldampuia ten goal 11 ve ve an khung.

Sawmfela tan top scorer ni turin goal khat khung belh emaw emaw minute 78 hmaa thlak a ngai, amaherawhchu Ramhlun South tlangval hian second half-a a chance ṭha ber chu goal ban pet per nan a hmang. Minute 80-naah Sawmfela hi thlak zui a ni a, khelmuala hun hmang tlem zawk Dampuia hnenah top scorer chawimawina pek a ni.

Ramhlun South tlangval Sawmfela hi Mizo zinga forward ṭha berte zinga chhal theih a ni a, MPL-ah pawh best player-ah thlan a ni tawh a, best forward atan vawi hnih thlan ni tawh mah se tun thlengin MPL top scorer a la ni lo.

Thawnthu thar

Chhinga Veng forward Dawngtea hian MPL7-ah goal riat khung turin minute 1170 a hmang a, a elpui Lalfakzuala hian minute 1206 a hmang thung. Police forward Fakzuala hi final-ah a inlan dawn tawh lo a, Bawngkawn tlangval erawh a la inlan dawn avangin top scorer tur hi a la chiang lo.

Dawngtea khelh tamna hi minute 36 chauh a ni a, Chhingcows forward hi a inlan apianga minute 90 khel ziah a nih avangin mimal chawimawina dawn a tum a nih chuan goal khung a mamawh. Bawngkawn tlangval hian goal a khung lo a nih chuan Fakzuala hnenah top scorer chawimawina hi hlan tur a ni ang.

Remsanga hi...

Chhinga Veng khingpui tur Aizawl FC aṭanga goal khung tam ber F. Lalremsanga tan top scorer nih theihna kawng a la inhawng a, Lengpui tlangvalin he chawimawina a dawng dawn a nih chuan hattrick a siam a ṭul bakah Dawngtea'n goal dang a khung belh tawh loh a ngai bawk ang.

Remsanga hi khelmualah minute 1021 chiah a inlan a, final hi a khel tluan a nih pawhin a elpui pahnih te aiin khelmualah hun a la hman tlem zawk dawn tho avangin minute lamah buaina a nei lo a, goal khung belh erawh a mamawh tam hret thung. MPL final-ah hattrick siam an la awm ngai lo a, tun season-ah Dawngtea chiahin hattrick a la siam avangin Remsanga tan a awlsam dawn lo.