Lazio khingpui tur Zenit

Lazio-in zanin dar 1:30 hian Champions League-ah Zenit an mikhual dawn. Italian club hi Europe-a an match hnuhnung pahnihah Club Brugge leh Zenit nen 1-1 ve vein an inhnehtawk.

Simone Inzaghi hote hian kum 13 chhung Europe-a inelna sang ber an inlan loh hnuah match hmasa berah Borussia Dortmund 3-1 a hnehin bul an ṭan. 

Amaherawhchu dam-lohna leh inhliam vangin Lazio an buai a, match hnuhnung pahnihah starting eleven-a tel ṭhin paruk chiahin bul an ṭan thei a, point hnih chauh an hlawh chhuak.

Lazio hian Covid-19 positive vanga an chhawr theih loh Ciro Immobile an hmang leh thei tawh a, season liam taa European Golden Shoe dawngtu Immobile hi goal nen a rawn kir.

Kartawp Serie A inkhelah Lazio-in Crotone 2-0 in an hneh a, goal hmahruai khungtu chu Immobile a ni. Italian club khingpui tur Russian club Zenit erawh match hnuhnung berah Akhmat Grozny nen 2-2 in an inhnehtawk thung a, table-ah pahnihnaah an awm phah thung.