United an zawr - Juventus an dang chuang lo

Nilaini zan Champions League inkhelah beisei loh result a thleng - Manchester United leh Juventus chu Group H-ah an tlawm ve ve a, last 16 erawh an luh chian tawh avangin an buai phah lo.

Manchester United hian an mikhualna ramah Valencia chu 1-2 in an ngam lo a, Juventus chu rin loh takin Young Boys lakah 1-2 thoin an tlawm bawk. Italian champion chak zawh loh zanah United-in hnehna chang se chuan group hmahruaitu ni thei tur an ni a, mahse an hun ṭha neih an chhawr thei tlat lo.

United hian hnehna chang ngat se chuan last 16-ah Atletico Madrid, Roma, Schalke, Ajax leh Lyon zinga eng team emaw ber hi an tum dawn tihna a ni a, mahse hnehna an chan loh avangin Barcelona, Borussia Dortmund, Paris St-Germain, Porto, Real Madrid leh Bayern Munich zinga eng team emaw ber hi an tum tur a ni dawn.

Red Devils hian kawng awlsam zawk thlang thei an nih laiin a harsa lamah an kal dawn tih a lang a, Premier League-a beisei phak lo team tan quarterfinal luh a hautak dawn tih chu an hmaa inchhawp thei team thlirin a lang nghal.

Jones & own goal

Valencia-in minute 17-na lekah Carlos Soler hmangin goal hmahruai an khung a, Spanish midfielder hian Phil Jones-a ball tauh chhuah chu lo changin goal-ah a chantir - tun season-a a vawi nga nana inlan Jones dinhmun a chhe dawn chauh!

Minute 47-naah English defender hian an lamah a ti lut zui a, minute 50 pawh a tlin hmain Valencia lamin 2-0 in hma an hruai der - Jones hi November 2011 hnua United player Champions League-a mahni lama goal khung hmasa ber a ni. 2011-a own goal neitu hi Jones tho hi niin Benfica lakah an lamah a ti lut.

United mualpho zualpui khuh turin Jose Mourinho-a substitution siam a fuh a, minute 87-naa an goal neihchhun khung turin bench aṭanga luhtir Marcus Rashford, Ashley Young leh Jesse Lingard te an 'thawkho' ṭha hle.

Jesse Lingard-a'n ṭha taka ball a lakluh hnuah Young a pe phei a, English left back hian goal chhungah thlawh lutin Rashford chuan goal-ah a lo chantir - United-in goal dang erawh an neih belh lo a, 1-2 in an tlawm.

Jones chauh lo pawh...

Manchester United-in goal hnih an chhuah danah Jones chu dem kai ve ve a ni a, chak loh chhanah English defender chauh puh erawh a dik lo ang - United team pumpuiin an khel chhia a, kartawpa Liverpool tum tur an nih avangin an result a lawmawm loh.

Fulham 4-1 ngawta an sawp ṭuma Paul Pogba a inlan loh hnuah Valencia a hmachhawn a, inkhelh hmain United boss Jose Mourinho chuan Pogba hming langsar taka lamin a team tana danglamna thlen tura a duh thu a sawi.

Mahse, Pogba hian si khat an phurh laiin sutna remchang a nei a, Marouane Fellaini-a ball tauh thlak chu hnai set sawt aṭangin chiang zetin a pet out - player tam zawkin goal-a an chantir ngei tur hun ṭha a ni.

Pound maktaduai 47 man Fred-a'n a man to chhan a la pholang thei lo tluang zel a, striker Romelu Lukaku lah Lingard-a'n a thlak hma zawngin player ti kimtu satliah ve mai a ni a, inkhel pumpui thlirin United-in goal hnih aia tam an chhuah lo hi an vannei hle.

Hnathawk ṭha Mou?

Manchester United-in mualpho takin hnehna an chang zo lo a, coach Jose Mourinho erawhin last 16 an luh tho avangin a lawm thu a sawi.

Portuguese manager chuan, "Group harsa tak aṭangin knockout round kan lut a, harsa tak chungin kan hna kan hlen thei a ni," a ti a, "Kan khel ṭha tawk ṭhin lo tih ka pawm a, mahse buaina kan neih leh player inhliamte ngaihtuah chuan kan ti ṭha em em a ni," a ti.

United boss chuan Valencia lakah an khel ṭha lo tih a pawm thu sawiin, "First half-ah khan kan hahdam lutuk a, kan nawr tur angin kan nawr na tawk lo a ni. Chawlhlawk hnuah khan kan insiamṭhat ka beisei a, mahse mahni lamah kan khung leh ta bawk si a ni," tiin a sawi.

Barakhaih Juventus!

Italian champion Juventus-in group mawngphah luahtu Young Boys an hneh loh hi tumahin an ring lo ang - mahse a thleng miau si.

Swiss club hian minute 30-na lekah Guillaume Hoarau-a penalty chhuih luh hmangin hma an hruai a, Juventus an hawihai. Italian club-in an si phurh sut ngei tum mah se Cristiano Ronaldo hoa khel team hian goal an zawng hmu thei lo.

Young Boys bawkin goal an khung nawn leh a, a khungtu pawh French striker Hoarau tho a ni a, counter attack hmanga an nawr let chu Juve hian an dawl lo.

Juventus mualpho lutuk tur tih ziaawm nan Paulo Dybala chuan minute 80-naah an si phurh a rawn sut ṭhen a, goal hnihna erawh an nei thei ta lo. Italian champion an vannei a, United an lo chak loh ve tho avangin hmahruaitu nichungin last 16 an lut.