Rangers an sang tual tual

Steven Gerrard enkawl Rangers-in hnehna an chang chho zel a, league match-ah Aberdeen chu 4-0 ngawtin an sawp. Scottish Premiership-ah an hnuai chiaha awm Celtic aia point 11-a sang falin hma an hruai mek a, match hnihin an khel tam thung. 

Rangers tan Ryan Kent, Kemar Roofe, Scott Arfield leh James Tavernier (penalty)-ten goal khat ṭheuh an khung a, league match 15 an khelh tawhah vawi hnih draw result an nei tih loh chu point hloh an la nei lo. 

Steven Gerrard chuan, "Tuna kan awmnaa awm hi nuam ka ti a, mahse inngaitlawm taka awm tur a ni. Kan inkhelh apiangin league table ka en ṭhin tih hi phat buai ka tum lo - mahse, eng manager mah hi November-a champion ang maia khawsa ka la hre lo. 

"Inkhelh tur tam tak a la awm a, chona tam takin min la hmuak a ni. Ka hlim thu erawh zep ka tum lo," a ti a, Inrinni zan khan an elpui Celtic chuan 2-2 in Hibernian an inhnehtawkpui thung. 

Rangers hian Ningani zan dar 1:30-ah Europa League group stage match khel turin Benfica an mikhual dawn a, group stage match thum an khelh tawhah point sarih hmua tlawm la nei loin group D-ah hma an hruai mek.