City ngamtu Liverpool - Mangṭha treble; hello quadruple?

Manchester City-in treble champion nih an tumna chu an mangṭha a ṭul a, Liverpool-in quadruple champion ni tura an beiseina an chhi nung zel thung - English football a ngaihnawm zel e.

Inrinni zan khan FA Cup semifinal-ah Liverpool chuan 3-2 in Manchester City an hneh a, Sadio Mane chuan goal hnih khungin Ibrahima Konate chuan goal khat a thawh ve bawk.

Liverpool-in goal thum an khung hnuah City tan Jack Grealish leh Bernardo Silva ten goal khat ve ve an khung ve leh a, an harhchhuah a tlai avangin an team chhanhim nan a tawk zo lo.

Pep Guardiola-a'n champion an tumna apianga lo lang ṭhin Reds chungchanga, "Ka ning takzet a ni," a tih chu City fan-ten an hriatthiampui ngeiin a rinawm - Premier League leh Champions League-ah an la inel.

A pawi zo ta
City game cheimawi ṭhintu chu Kevin de Bruyne a ni a, tlarhnunga ban rinawm tak pakhat chu Kyle Walker a ni - mahse, player pahnih an inhliam a, Pep-a'n Reds lakah a chhawr thei lo.

Spanish coach hian FA Cup-ah Ederson aiin Zack Steffen a chhawr zawk ṭhin a, semifinal match hautak khel tur ni mah se Pep-a'n American keeper chunga rinna nghah a thlang.

Mahse, Pep-a'n a tisual a ni tih inhre turin hun rei a mamawh lo. Minute kuana lekah Andy Robertson-a corner aṭanga ball kal chu defender zuang sang Konate chuan a tauh lut a, Steffen tan tih ngaihna a awm lo.

French defender Konate hian tun season-a goal thum a khungna a ni a, Reds tan bul a ṭanna match hnuhnung pathum aṭangin goal a khung vek!

Ederson lo deuh!
Inkhel ṭantir aṭangin Reds game a nung ṭha a, kawng tinrengah City-in an phak lo tiin a sawi theih - hetiang boruak karah hian Ederson aia thlan Steffen a chesual a, an first choice keeper tihdan anga tih a tum chu a tifuh lo.

Premier League-a team pahnih an inhmachhawn hnuhnung zawkah khan Ederson-a'n huaisen takin goal line bulah ball a khalh a, Diogo Jota-a'n a nang hman lo - Steffen-a'n Ederson tih dan entawnin a ti ve a, mahse, a bul hnai lawka awm Mane chuan a lo tlawh goal hman!

Minute 17 chhung lekin Liverpool-in goal hnih an khung a, a chetsual vangin Steffen-a'n kawh rawn hlawh mah se City player-ten beisei an phak lo tlang a ni.

Liverpool an khel ṭha tulh tulh thung - minute 45-naah khel ṭha em em mai Thiago Alcantara ball pass ṭha bik chu Mane-a'n goal-ah a chantir leh a, 3-0 ni chungin chawlhlawk an hmang.

Harh a tlai
Wembley Stadium-ah comeback turin City tan thilmak a thlen a ngai tawh a, beiseina tlem awm chu Grealish-a'n second half ṭan aṭanga minute hnihna lekah a chhit nunsak.

English midfielder hian Gabriel Jesus-a siamsak chu si phurh sut ṭhen nan a hmang - City an phur sawt tura ngaih a ni a, first half aiin khel ṭha mah se goal hmaah an hriam tawk lo.

Jesus-a'n goal khung theihna remchang vawi hnih ngawt nei mah se Alisson chuan ṭha zetin a dansak ve ve a, hun pek belh minute khatnaah Silva chuan goal khat khung ve leh bawk mah se an harh a tlai hret tawh.

Liverpool-in hnehna chan an phu ang ngeiin hnehna an chang a, hun tawp lama an talbuai avang erawh chuan Jurgen Klopp-a'n a team-ah siamṭhat tur nei lo tawp a ni bik lo.

Ka naute khelh dan ka chhuang a, a ropui takzet a ni. First half kha kan khelh ṭhat ber pawl ni hialin ka hria. Engkim kan ti dik a ni ber a, a hunah tak goal kan khung a, second tin mai kha nuam ka ti em em vek.
Second half-ah goal nen City-in bul an rawn ṭan a, game kha a inhawng ta deuh a ni. City quality a san avangin kan zah a, anni laka chak chu thil awlsam a ni lo. Mahse, player ṭha tak tak kan nei a, anni zarah chance kan nei ve leh mai ṭhin zawk a ni. - Jurgen Klopp, Liverpool manager

First half harsa tak kan hmachhawn hnuah kan theihna zawng zawng kan hlan a, an goal hmasa ber set piece hmanga an rawn khung kha chuan an ṭha em a ni. Kan goal hnihna kha chu tihsual palh liau liau a ni a, comeback harsa mah se second half-ah kan ti ṭha hle. - Pep Guardiola Manchester City boss

FA Cup Semifinal
April 16, Inrinni Zan
Manchester City 2 - 3 Liverpool
MNC: Jack Grealish 47'; Bernardo Silva 90+1'
LIV: Ibrahima Konate 9'; Sadio Mane 17', 45'

April 17, Pathianni Zan (Result kan hre hman lo)
Chelsea 9:00 PM Crystal Palace

Inkhel Chhehvel
• League Cup-ah Liverpool an champion tawh a, FA Cup-ah final an lut a, Champions League-ah semifinal an lut tawh a, Premier League-ah hmahruaitu City chu point khatin an phak lo mek bawk.
• Sadio Mane-a'n City lakah goal 10 a khung tling ta a, kum 2014-a England a pan hnuah ani aia City laka goal khung hnem an awm lo.
• Thawhlehni zanah Premier League khel turin Liverpool an inlan lehnghal dawn a, Manchester United an mikhual ang. Nilaini zanah City chuan Brighton & Hove Albion an mikhual dawn bawk.
• City-in Premier League-ah hma an hruai mek a, Champions League semifinal an lut bawk - treble beiseina erawh a bo ta rih.
• Hillsborough chhiatna thlen cham vawi 33-na a ni a, chhiatnaa thite hriatrengna hun hman laiin City fans ṭhenkhat an lo beng chheng a, Manchester khaw club hian Liverpool hnenah ngaihdam an dil zui.