Man United beiseina siamtu Ronaldo hattrick ; Arsenal leh Tottenham Hotspur an chesual

Cristiano Ronaldo-a'n mi bik a nihzia a pholang leh ta. Portuguese forward hattrick hmangin Inrinni zan khan Manchester United-in table mawngphaha awm Norwich City chu 3-2 in an hneh a, point thum hlu bik an hlawh chhuak.

Premier League inkhel dangah Arsenal leh Tottenham Hotspur ten an khingpui Southampton leh Brighton & Hove Albion te 1-0 ve vein an hneh lo a, Champions League khelh tuma inum boruak a sang leh ta hle.

Spurs an chak lo
Tottenham-in kartawp inkhel bul ṭan nan Brighton an mikhual a, Antonio Conte hote tan point thum hmuhchhuah harsa lo tura ngaih a ni. Amaherawhchu Arsenal hneh zo hlim Seagulls-in tum dang an nei a, Spurs lakah tlarhnung an tiphui ṭha hle.

Conte hote hian March 17 khan Brighton hi 2-0 in khualmualah an hneh a, match thum dang chak zuiin match hnuhnung pali aṭangin point 12 an hmuh bakah goal 14 tehmeuh an khung a, goal hnih chiah an chhuah bawk.

Inrinni zanah Spurs tan Harry Kane, Son Heung-min leh Dejan Kulusevski ten bul an ṭan chungin Brighton tlarhnung lakah an hnawksak lo. Mikhual team tan Leandro Trossard chuan minute 90-naah ṭha zeta lalutin mawi zetin goal kilah a khung a, Brighton-in 1-0 in hnehna a chang.

Italian manager Conte chuan, "Result ṭha a ni lo. Kan chak thei lo a nih pawhin kan tlawm tur a ni lo tih kan hriat nawn a ṭul. Brighton an khel ṭha a, hun thawl min pe lo. Chutihrualin kan khel ṭha tawk lo a, tun aia ṭha khan kan khel thei a ni," tiin an khel ṭha tawk lo tih a pawm.

Arsenal squad a pan!
Arsenal-in St Mary's Stadium-ah Southampton an tlawh a, 1-0 in an chak lo. Goal awmchhun hi minute 44-naah Jan Bednarek-a khung a ni a, Gunners-in a chhanletna an nei lo. Mikel Arteta hote hi match hnuhnung pathumah an chak lo vek.

Gunners hi an khel ṭha tawk lo a, goal hmaah an vannei tawk lo bawk. Goal la luh hmain Bukayo Saka-a'n keeper Fraser Forster chauh a hmachhawn hnuah a khung lo. Forster hian Emile Smith Rowe leh Granit Xhaka te goal khung tur a dansak bawk.

Arsenal hi a zawna vawi thum an chak lo a, vanduai vang chu ni bawk mah se squad chhah tawk loh vang niin a lang. Midfielder pawimawh Thomas Partey leh defender Kieran Tierney te chu tun season-ah an inlan theih a rinawm tawh lo a, Alexandre Lacazette leh Takehiro Tomiyasu ten hliam vangin Saints an hmachhawn thei lo. Gunners hmatawnga awm Eddie Nketiah-a'n tun season Premier League-ah goal a la khung lo a, vanneih a harsa ang.

Spanish manager Mikael Arteta chuan, "Kan chak loh dan kha a danglama a, sawifiah pawh a harsa. Inkhel ente chuan awlsam takin Arsenal chak turah an ngai ang. Mahse, chak tur chuan goal khung a ngai. Danglamna thlen tur chuan hun pawimawhah thutlukna dik siam a ngai a, tun dinhmunah kan ti thei lo," tiin an vanduai thu a sawi.

Ronaldo Show
Manchester United-in Old Trafford-ah Norwich City an mikhual a, 2-0 a hma an hruai hnuah an insut zawhtir. Minute 76-naa Ronaldo freekick hmangin mualneitu hi 3-2 in an chak hram a, kum 37 mi Portugal captain chu Man United chhandamtu a ni.

Canaries defender tihsual zarah Ronaldo-a'n minute sarihnaah goal hmahruai a khung a, minute 32-naah ṭha zetin a tauh goal leh bawk. Man United tan awlsam taka chak theih tur ni tawh mah se Norwich tlarhma lakah Harry Maguire leh a ṭhiante an buai hle.

Canaries-in first half tawp hmaa Kieran Dowell hmanga siphurh an sut ṭhen hnuah minute 52-naah Teemu Pukki-a'n siphurh a sut zo. United chhanhim turin David de Gea a che ṭha zui a, a tawpa danglamna chu Ronaldo a ni.

September 2020 hnua a vawi khat nan Ronaldo-a'n freekick aṭangin minute 76-naah chakna goal a khung a, Portuguese forward hian sawisel hlawh ṭhin mah se a hun teah a rah leh ṭhin. Kum 37 mi a ni tawh chungin tun season-ah goal 15 a khung tawh a, Mohamed Salah (20) leh Son Heung-min (17) te chauh goal khung tam lamah a pha lo.

Ronaldo hian a career-ah hattrick vawi 60 a siamna a ni a, Man United tan vawi thum a siamna chauh a ni. Man United number 7 hian March thlatir khan Tottenham lakah hattrick a siam a, Man United-in season thara Champions League khelh beiseina an neih nan a ṭangkai hle.