Liverpool leh City zaninah an inlan dawn City tan mualpho nawn a thiang lo

Premier League champion Liverpool inlan hun a thleng leh ta a, zanin dar 12:45 hian Brighton & Hove Albion chu khualmualah a lenchilh ang. 

Liverpool an champion chian tawh avangin ṭum dang angin an inkhel turin ngaihven a hlawh tawk lo a, season thara an bul ṭan dan tur ri neuh neuh chu sawi hlawh ber a ni tawh zawk. Manchester City chuan zanin dar 10:30 hian Newcastle United an mikhual dawn bawk a, team pahnihin khelh chhan em em an neih tawh loh avangin boruak a 'hot' viau a beiseiawm loh. 

City hian Champions League hmun la tichiang lo mah se palina aia hniama season an khar chu a rinawm chiah lo a, season thara Premier League khel turin Newcastle United an inhamtang chiang tawh bawk. 

Jurgen Klopp-a'n season thar atan Liverpool a buatsaih ṭan der tawh a, rawlthar player zingah Curtis Jones chu contract thar a ziahpui hnuin Harvey Elliott chu a professional contract hmasa ber pek a ni leh ta. Kum 17 mi midfielder hian tun season inelna hrang hrangah Liverpool tan match riat a khel tawh a, an champion chian tawh avangin Klopp-a'n bench aṭangin hun ṭha a siamsak zeuh zeuh a nih pawhin a mak lo ang. 

Tun season-a match riat khel tawh ve tho Neco Williams pawh season tawp lamah a hmel kan hmuh tam a beiseiawm a, kum 19 mi right back hi a khelh chhunah a khel chhe ngai lo. Curtis Jones-a'n tun season inelna hrang hrangah match kua khel tawhin goal thum a khung a, kum 19 mi midfielder hian Reds match hnuhnung bera  Aston Villa 2-0 a an hnehna inkhelah Premier League-a a goal hmasa ber a khung. Player pathum hian Brighton an hmachhawn a nih pawhin Klopp-a'n season thar atan a team a din ṭan tih i lo hrethiam dawn nia. 

Tarlan tawh angin Klopp-a ngaihtuahna luahtu chu season thar a ni tawh a, player naupang zawk chher hriam piah lamah a puitling sa lakluh belh tur zawngin a mit a len vel mek. German coach hian Bayern Munich midfielder Thiago Alcantara chu lakluh a tum nia sawi a ni a, pound maktaduai 31 man ni tura ngaih a ni. Midfield-a Georginio Wijnaldum, Naby Keita, James Milner, Jordan Henderson leh Alex Oxlade-Chamberlain nei sa Klopp-a'n season tharah nomawi hloh a tum lo tih a chiang hle. 

Liverpool-in ruahmanna an neih sa zawng zawng hlawhtling a, tha tho taka season thar an thlir theih nan erawh an hmabak match la awma chak zel hi a pawimawh lai chu a ni - Brighton hneh ngei an duh ang. Hetihlai hian Andrew Robertson, James Milner leh Dejan Lovren ten hliam tenau an nei a, Mohamed Salah, Roberto Firmino leh Sadio Mane te erawh an in 'fit' ṭhat avangin tlak hlau Brighton lakah goal khung an inthlahrung dawn lo. 

'Manchester City leh talbuai' tih hman kawp hi thu inrem lo tak a ni ṭhin a, tun season-ah erawh a ni ta lo. City hian an match hnuhnung berah Southampton chu rin loh takin an ngam lo a, tun season Premier League-ah vawi kua ngawt an tlawm tawh!

City hian Saints an ngam loh hmain champion 'hangover' la reh lo Liverpool chu 4-0 ngawtin an sawp a, Raheem Sterling chuan, "Season thar kan ṭan tawh a ni," a ti zui zat. Mahse, English forward a lo ṭawng pawr hma hret a, Saints an ngam lo zui. City hian season thara Liverpool elpui an tum a nih chuan tun aṭangin insiamṭhat an mamawh tih a lang a, a bul ṭan nan Newcastle United hman a ngai. 

City tan St Mary's-a an inlan loh hnuah Kyle Walker leh Benjamin Mendy chu lo kir tura ngaih an ni a, Magpies hian hliam vangin player pawimawh Allan Saint-Maximin, Florian Lejeune, Ciaran Clark, Isaac Hayden leh Sean Longstaff an chhawr theih a beiseiawm loh - City tan chak loh chu mualphona a ni ang. 

City boss Pep Guardiola-a'n Saints an ngam loh zawhah, "Player thar mamawh vang a ni lo," tiin sawi mah se tun season-a an chet chhiat chhan en chuan bazar an mamawh tih a lang. Tlarhnung lama Aymeric Laporte inhliam rei lutuk te, John Stones leh Nicolas Otamendi ten tun season-a beisei an phak ta lo lutuk leh Vincent Kompany chhuak te chu City buaina pakhat tih chiang takin a lang chhuak. 

David Silva-a'n tun season-ah a contract a hmang zo tawh dawn a, season thar zawh hunah Fernandinho leh Sergio Aguero te contract a zo dawn bawk - an cham chhunzawm beiseina a tlem hle. Heng zawng zawng rilrua dah chungin Pep hian Premier League-a match hmabak an la neih hi inzir nan a hman thiam a pawimawh a, season tawp lama an khelh dan hian season thara City tur a hril ang. 

Zanin Inkhel Tur

Manchester City    10:30 PM    Newcastle United

Sheffield United    10:30 PM    Wolverhampton 

        Wanderers

West Ham United    10:30 PM    Burnley

Brighton & Hove Albion    12:45 AM    Liverpool

July 9, Ningani

AFC Bournemouth    10:30 PM    Tottenham Hotspur

Everton    10:30 PM    Southampton

Aston Villa    12:45 AM    Manchester United