Brentford-in Watford an ngam

Inrinni zan inkhelah Brentford chuan 2-1 in Watford an ngam a, Premier League-ah a vawi khat nan a zawnin vawi thum hnehna an chang ve ta - Brentford hian team ṭha Chelsea leh West Ham chu a zawnin an lo hneh tawh bawk.

Brentford tan Christian Norgaard chuan minute 15-na lekah goal hmahruai a khung a, Watford-in minute 55-naah Emmanuel Dennis hmangin an chhanglet.

Team pahnih hi point khatah an lungawi mai a ṭul dawna a lan laiin Watford an vanduai a, hun pek belh minute nganaah Pontus Jansson chuan Brentford tan chakna goal a khung - Watford tan chhanletna hun a awm tawh lo a, an tlawm.

Watford an tlawm avangin Premier League table-ah 19-na an ni a, a him china awm Everton chu point rukin an phak lo mek - match hnihin an khel tam zawk bawk.

Roy Hodgson-a enkawl team hian league match ruk chiah khelh tur an nei tawh a, an hmachhawn tur zingah Manchester City, Leicester City leh Chelsea an la tel avangin league-a inhamtang tur chuan an tan thil mak a thlen a ngai tawh.

Watford boss Hodgson chuan, "Chung lamah khian min ngaina lotu a awm a ni," tiin goal hmaa an vanduai thu a sawi a, English coach chuan, "Kan vannei tawk lo a, chu chuan kan thiam lohna erawh a thai bo lo," tiin a naute an khelh ṭhat tawk loh thu erawh a pha lo.

Hun pek belha Brentford goal hnihna tur assist-tu Christian Eriksen a lam loh theih lo a, Danish midfielder-in Brentford game a thlak danglamzia chu a hretute kan ni - league match rukah goal khat khungin assist vawi hnih a nei ta der.