Curry hoin Warriors an chak phawt

Stephen Curry hliam a dam tawh a, mamawh hunah a lo kir thei. Nimin zing NBA Western Conference playoff game 1 inkhelah Golden State Warriors chuan Denver Nuggets 123-107 in an hneh.

Thawhlehni zing dar 7:30-ah game 2 khelh a ni dawn. Playoff chinah chuan best of seven series hmanga chak zawk zawn a ngai a, tlang tur chuan a tlem berah vawi li tal chak a ngai tihna a ni.

Curry hi a kerek hliam vangin regular season tawp lamah a inkhel thei lo, match 12 zet a zawnin a khel lo. Playoff khelh dawnah pawh mimal training a nei a, nimin zingah erawh minute 22 chhung a inkhel thei.

A tirah Curry hian bul a ṭan lo, a aiawha lut Jordan Poole chuan playoff match a hmachhawn hmasak berah point 30 a nei - Warriors tana point nei hnem ber niin a khel ṭha hle. Klay Thompson (19 points) a khel ṭha bawk.

Curry chuan, "Poole khan inkhelh a phu, a mawhphurhna pawh a hlen chhuak ṭha hle," tiin a fak a, a teammate Klay Thompson pawhin kum 22 mi Jordan Poole khelh danin a tih lawm thu a sawi ve bawk a ni.

Inkhel dangah Utah Jazz chuan Dallas Mavericks 99-93 in an hneh. Mavericks hian an player pawimawh Luka Doncic chu chawn hliam vangin an chhawr thei lo a, game 2-ah erawh a inlan theih a beisei awm.

NBA Western Conference Playoff - Game 1
New Orleans Pelicans 105 - 101 Los Angeles Clippers
Utah Jazz 99 - 93 Dallas Mavericks
Minnesota Timberwolves 130 - 117 Memphis Grizzlies
Denver Nuggets 107 - 123 Golden State Warriors