Semifinal-ah Zverev a tla

Alexander Zverev chu Stefanos Tsitsipas hneh loin Monte Carlo Masters semifinal-ah a tla. Champion lai hian 6-4, 6-2 in hnehna a chang a, nizan khan Alejandro Davidovich Fokina nen final an khel zui leh nghal.

Zirtawpni zan khan Tsitsipas leh Zverev te hian quarterfinal paltlang turin darkar thum chuang ve ve hun an hmang. Inrinni zanah an intawng zui leh nghal a, chawlhna hun rei lote an neihah Tsitsipas a hahdam hma zawk tih a lang.

Tsitsipas leh Zverev te hi clay court-a inkhel thiam an ni a, season hmang ṭha viau lo mah se Monaco-a tournament khelh laiah an che ṭha a, chak zawk tur pawh rin thiam a harsa hman viau.

Mahse, set hnih an khelh chhung zawngin Tsitsipas a chungnung a, darkar khat leh minute 15 an khelh chhunga player ṭha zawk a nih avangin harsa vak loin a chak.

German tlangval Zverev tan pawh Monte Carlo Masters hi hun ṭha a ni ve tho. Tournament a khelh hnuhnungah nungchang mawi lo vanga hrem a ni a, a lo kir lehna hmasa a semifinal a thlen theih avangin lawm tur a ni.