Mumbai City tan hmabak a hautak

AFC Champions League-ah zanin dar 10:45 hian Mumbai City an inkhel dawn a, an hneh loh hlim Al Jazira nen an inkhel ang - an chak loh chuan last 16 luh beiseina a tlem tawh dawn.

Mumbai hian an match hmasa berah Al-Shabab chu 3-0 in an ngam lo a, an match hnihnaah Champions League-a Indian club chak hmasa ber ni turin Air Force Sports Club chu 2-1 in an hneh.

Mahse, kar hmasa khan Al Jazira chu 1-0 in an ngam lo a, match thum aṭangin point thum chiah an la hmu - zaninah chak ngei an mamawh dawn.

UAE club ṭha Al Jazira hian an ram striker ṭha mi Ali Mabkhout an kawl a, UAE tan match 103 a khelha goal 79 khung thei striker hi Asian football-ah chuan hming langsar pawl a ni a, Mumbai tlarhnung tan ven bik a sual lo ang.

Midfielder Thulani Serero hi Dutch club ṭha Ajax tana season nga ngawt khel thei a ni a, South Africa tan vawi 41 a inlan tawh bawk - inkhel thlak danglam turin a ṭha tawk.

Abdoulay Diaby hi Mali tan vawi 24 inlana goal sarih khung thei a ni a, kum 30 mi winger hian Lille, Club Brugge, Sporting Lisbon, Besiktas, Getafe leh Anderlecht tan a lo khel tawh a, Mumbai lakah a inthlahrung lo ang.

Mumbai City tan Lallianzuala Chhangte leh Lalengmawia (Apuia) te chuan Champions League match thum an khelhah minute an la khel kim vek a, zaninah pawh bul ṭan leh ngei tura beisei an ni. Mumbai hian defender Hmingthanmawia (Valpuia) an kawl bawk.