Championship stage khel tur a chiang hnai

18th April, 2022

Aizawl FC-in league round thawh khatnaa an match khelh tur ang an khel zo tawh a, I League team dang 12-in round tawp ber an khel ang. Tun dinhmunah championship stage khel tur team paruk a chiang tawh a, team pakhat chiah a chiang tawh lo.

Vawiin tlai dar 3:00 hian I League kai thar Rajasthan FC leh Sreenidi Deccan te an inkhel dawn. Rajasthan hian point an hmuh hrim hrim chuan championship stage an khel thei dawn a, an chak lo a nih pawhin a sang pasarih zinga tel theihna kawng a la inhawng zau hle.

Rajasthan elpui Real Kashmir chuan April 19, Thawhlehni zan dar 8:05 hian Trau an hmachhawn dawn. Kashmir club tan championship stage beiseina nei turin Rajasthan an chak loh a ngaih bakah Manipur club lakah chiang takin an chak a ngai bawk.

Engtin zel?
I League-ah hian team 13 an awm a, vawi khat ṭheuh an inkhelh kual zawhah a sang pasarihin championship stage an khel dawn. Tun dinhmunah Gokulam Kerala, Mohammedan, RoundGlass Punjab, Sreenidi Deccan, Neroca leh Churchill Brothers ten championship stage an khel dawn tih a chiang tawh a, hmunruak pakhat hi Rajashtan leh Real Kashmir ten an inchuh ang.

Team pasarih hi vawi khat ṭheuh an inkhel kual leh ang a, an point hmuh chu an point hmuh tawh sa nen an belhkhawm ang. Gokulam Kerala chuan Zirtawpni zan khan Sudeva Delhi 4-0 in an hneh a, hmahruaitu an ni mek. Gokulam forward Luka Majcen-a'n hattrick a siam a, Kerala club hi an champion dawn a nih chuan Slovenian forward hi a chet ṭhat zel a ṭul dawn a ni.

Chutihrualin Mohammedan-in Gokulam hi point hnih chiahin an pha lo a, Kolkata club-in champion beiseina sang tak an la nei. Mizo tamna Mohammedan hian vawiin tlai dar 5:05 hian Manipur club Neroca an hmachhawn ang.

Aizawl FC erawhin Trau, Indian Arrows, Sudeva Delhi leh Kenkre te nen relegation stage an khel dawn a, Real Kashmir emaw Rajasthan emawin an rawn la belh dawn. Team parukte hi vawi khat ṭheuh an inkhel chhuak leh ang a, point hmu hniam ber an relegate dawn. Chutihrualin rawlthar ṭha rual awm khawmna Indian Arrows erawh an relegate ve thei lo.