Goal ruk khungtu Haaland awmna Dortmund

Hliamin a tibuai ve fo a, harsatna nei loa a inkhelh theih phawt chuan Erling Braut Haaland tan goal khung hi thil harsa a ni ve lo. Goal hnih khungin Borussia Dortmund chu Wolfsburg lakah 6-1 in hnehna a chanpui.

Inrinni zan Bundesliga inkhelah Dortmund hian chawlhlawk hmain goal nga an khung hman. Tom Rothe, Axel Witsel, Manuel Akanji, Emre Can leh Haaland ten an khung.

Second half-ah Haaland-a'n a khung belh a, hun tawp dawna Ridle Baku goal khat khungin Wolfsburg mualpho lutuk tur a hliahkhuh phak tawh lo, khualmualah an zawr hneh hle.

Dortmund hi Bundes-liga table-ah pahnihna an ni chhunzawm, hmahruaitu Bayern Munich an phak lohna chu point ruk a ni a, match khata an khelh tam bawk avangin nomawi beiseina a sang tawh lo.

Chak lo Wolfsburg erawh tun hnaiah an talbuai hle, match hnuhnung pangaah vawi li ngawt an tlawm - heng inkhelah hian goal 14 tehmeuh an chhuah bawk a, insiamṭhat an ngai takzet.