La Liga-ah Villarreal an chak

Champions League semifinal an khelh dawn avangin Villarreal-in ngaihven an hlawh thar a, Inrinni zan an inkhel tur pawhin ngaihven a hlawh hle - La Liga match-ah Getafe chu 2-1 in an hneh.

Villarreal hian minute 16 chhungin goal hnih an khung a, striker ṭha Gerard Moreno chuan minute sarihna lekah goal hmahruai a khung - kum 30 mi striker tan tun season inelna hrang hranga goal 13 a khungna chiah a ni a, assist vawi ruk a nei tawh bawk.

Minute 16-naa Manuel Trigueros-a'n an goal hnihna a khung theih nana counter attack bul ṭantu pawh Moreno a ni a, tun season-ah hliam vanga a talbuai ngun viau chungin Villarreal tan a thawh hlawk hle.

Mahse, Getafe lakah pawh tihrawl hliam vangin Moreno lakchhuah a ngai a, he thu buatsaih lai hian a lo kir hun tur a sawi theih loh. April 27 zanah Liverpool nen Champions League semifinal first leg an khel dawn a, a inlan theih loh chuan Yellow Submarine tan a pawi thei ang.

Moreno lakchhuah hnuah Getafe-in Enes Unal hmangin si phurh an sut ṭhen a, hun tawp thlenga goal dang an neih loh avangin an tlawm - an khelmuala league match 10 zet a zawna an tlawm tawh loh chu a tawp ta.

Villarreal striker hlui, kum 24 mi Unal hian tun season-ah league goal 15 a khung tling tawh. Getafe hian relegate loh chu an tum ber a ni a, Villarreal erawh parukna nih phak a, Europa Conference League playoff khelh phak chu an tum a ni.