Player pakua leh Juventus inhnehtawk

Serie A champion tum AC Milan leh Inter Milan an chak laiin, palina nih tum Juventus erawh player pakua a khel tluan Bologna nen 1-1 in an inhnehtawk, a sang pali zingah la awm tho mah se an dinhmun a him lo.

Old Lady hian match 33 aṭangin point 63 an hmu, pangana AS Roma chuan match 32 aṭangin point 57 an hmu thung, an khelh hmabakah an chak a nih chuan point thum chauhin an inthlau dawn - Champions League khelhna ticket inchuh boruak a sang zel dawn.

Point khat
An inkhelhna chu Allianz Stadium a ni a, mikhual Bologna player pahnih hnawh chhuah an ni. Amaherawhchu, heti chung hian mualneitu Juventus hian hun tawp hma chiaha Dusdan Vlahovic goal hmangin point khat an hmu hram.

Marko Arnautovic-a'n season kal laia Serie A goal 11-na khungin Bologna hma a hruaipui a, an hum rei thei ang reng hle. Minute 84-naah Adama Soumaoro leh Gary Medel te hnawhchhuah niin player pakuaah an tlahniam.

Hun pek belh minute riat a ni a, player pahniha a tlem zawk ni chungin minute 14 chhung an khel tihna a ni. Juve lamin striker Vlahovic hmangin an sut hram a, point khatah an lungawi a ngai.

Lawmna tur a awm
Juventus manager Massi-miliano Allegri chuan an duh ang result nei lo mah se, harsa taka point khat an hlawh chhuah hram avangin a lawm a, season tir lama an chak lohna ṭhin match ang mai a nih thu a sawi.

Allegri chuan, "First half kha kan khel chhe takzet, second half-ah hma sawn hret mah ila goal kan chhuah hmasa ta tho, hetiang match harsa leh hriatthiam har bik hi chu a thleng ve chawk.

"Palina ni phak tur chuan point khat lek pawh kan khawl khawm zel a pawimawh. Season tir lam ang kha chu ni se, tuna kan match angah hi chuan kan chak lo ang," tiin point khata a lawm thu a sawi.

Nomawi inchuh
Milan khawpuiin Serie A nomawi a kawl ngei dawn niin a lang - Inter nge Milan zawkin chawi dawn erawh a la hriat loh. Chutih rualin pathumna Napoli chu sawi bo theih an la ni chuang lo, match khat lekah an dinhmun a la inthlak thei.

Zirtawpni zanah Inter Milan-in Spezia 3-1 a hnehin hma an hruai a, Inrinniah AC Milan-in Genoa 2-0 a hnehin a chung ber an luah let ve leh thung. Milan club pahnih inkarah point hnih a awm, match khata khel tlem Inter hi hmahruai let leh nghal thei an ni.

Inter hian Jose Mourinho enkawl AS Roma an la hmachhawn dawn. Roma hi Champions League khelh tuma thapui thawh lai an ni a, a awlsam lo ang. Chutih rualin Milan pawhin Lazio leh Fiorentina te an la bitum ve dawn avangin a awlsam bik lo ang.

Eng nge an sawi?
AC Milan manager Stefano Pioli chuan, "Serie A bikah a zawnin minute 222 chhung goal kan khung lo a, tunah chuan an mutan ber kan paltlang ta, goal dang pawh an neih belh zel ka beisei sang hle.

"Hliam vanga player pawi-mawh chan nual mah ila hmalam kan pan thei hian min ti lawm," a ti. Zlatan Ibrahimovic, Alessio Romagnoli, Alessandro Florenzi, Simon Kjaer leh Samu Castillejo te chu hliam vangin an chawl mek.

Inter manager Simone Inzaghi pawhin beisei an neih san thu sawiin, "Eng inkhel pawh ni se chak hi a pawimawh, nomawi humhim hi kan thil tum ber a ni a, chu chu kan kuta awm a ni," a ti a, an elpui Milan nen inum tawk viau mah se chungnung zawk nih a tum.