Team talbuai Barca inlan zan

La Liga-a Atletico Madrid ngam lo hlim Barcelona chuan zanin dar 1:30-ah Champions League match khel turin Dynamo Kiev an lenchilh dawn a, result ṭha an beisei ang. 

Barca hi league lam ang lo takin Champions League-ah chuan an la ti fuh rih a, match thum an khelh tawhah hnehna an la chang vek - an hneh zingah hian Juventus an tel a, zaninah draw result ringawt an neih pawhin last 16 an lut chiang thei dawn. 

Mahse, Barca hian La Liga piahlamah buaina tam tak an la nei. Atletico nen an inkhelh ṭum hian Gerard Pique chu hliam vanga lakchhuah a ngai a, he thu buatsaih thleng hian a chawlh chen tur puanzar la ni lo mah se a hliam dinhmun enin thla thum aṭanga nga tal chawl tura ngaih a ni. 

Nipui transfer-a Manchester City centre back Eric Garcia lalut thei lo Barca hian Pique inhliam takah chuan tlarhnung laia chhawr turin Clement Lenglet, Samuel Umtiti leh Ronald Araujo chiah an nei. 

Spanish chanchinbu lar Marca chuan Barca thuneitute chu January transfer-a centre back lei chungchangah an ṭhukhawm dawn niin an sawi a, an sum dinhmun a ṭhat loh avangin a awlsam dawn lo thung. 

Barca hian Pique thlaktu tur an lei dawn chuan player hlawh tihhniam an mamawh dawn niin Marca chuan a tarlang a, an sum dinhmun a chhe takzet niin a lang. 

Hetiang boruak karah hian Lionel Messi chu Barca-a a tui loh thu media lamah a lang reng a, Manchester City nen sawizawm reng a ni bawk - Barca fan-ten thawk lak nan zanina chak ngei an duh dawn.