Europe-a inlan tur zingah Tottenham sawi bo theih an la ni lo

8th July, 2020

Thawhṭanni zan Premier League inkhelah Tottenham Hotspur-in Everton 1-0 in an hneh a, Jose Mourinho hote tan season thara Europe inelna a beisei ngam leh ta. Goal awm chhun hi minute 24-naah Everton defender Michael Keane-a'n an lamah a tilut a, Totttenham khelmualah goal dang hmuh tur a awm belh lo.

Spurs hian point 48 hmuin pariatnaah an awm. Premier League-a a sang paliin Champions League an khel a, league-a pangana bakah FA Cup leh League Cup champion tan Europa League a khelh theih bawk. Tun dinhmunah UEFA-in Manchester City a hrem a, CAS-in Pep Guardiola hote hremna hi hlip pawh ni se FA Cup leh League Cup quota hmangin Spurs tan Europa League khelhna kawng a inhawng zau hle.

Goal khat a tawk

Tottenham-in bul an ṭan ṭha a, Lucas Moura ball pet chu goal pawnah chiah a kal. Minute 24-naah Spurs-in goal an bawh nat rah an seng a, Giovani Lo Celso ball pet chu goal zawnah kal lo mah se Toffees defender Keane a per hnuah goal-ah a lut.

Everton tan half time tawp hma hretin Richarlison-a'n hun ṭha a nei a, Brazilian forward hian goal zawnah a pet lo. Second half-ah inkhel a danglam tam lo a, Spurs an che ṭha zawk a, Harry Kane erawh goal hmaah a hlauhawm hran lo.Amaherawhchu Spurs tan Son Heung-min a hmuhnawm a, South Korea star goal khung tur hi Toffees keeper Jordan Pickford-a'n vawi hnih a dansak a, ṭum khat dang erawh goal pawnah chiah a kal. Second half-ah goal lut tawh loin 1-0 in inkhel a tawp.

Mourinho tan 200

Tottenham-in hnehna an chan chiah hian Jose Mourinho tan Premier League-a a club enkawl vawi 200 a chakpuina a ni a, hetiang ti thei manager pangana a ni bawk. Premier League-a vawi 200 chak thei manager hi Sir Alex Ferguson (528), Arsene Wenger (476), Harry Redknapp (236), David Moyes (207) leh Jose Mourinho (200) te an awm. Mourinho hian vawi 200 chak turin match 326 a mamawh a, a tluk loh awmchhun chu match 322 mamawhtu Ferguson chauh a ni.

Tottenham-in July 9, Ningani zanah Bournemouth hmachhawn turin Vitality Stadium an tlawh dawn a, Cherries chet chhiat lai a nih avangin Mourinho hote tan point thum hmuh belhna hun remchang a ni thei ang.