Liverpool kaltluang lai dang turin United?

Premier League-a la tlawm miah lo awmchhun chu Liverpool an ni a, Pathianni zan dar 9:30-a an hmaa ding tur chu Manchester United an ni - chumiin thui tak a hrilhfiah chu Liverpool tan a vawi khat nan tlawm theih a ni, tih hi a ni.

Premier League-ah derby 'hot' tak tak a awm ṭhin a, mahse chung zawng ai pawha mipuiin an ngaihpawimawh leh an hmuh chak ber chu Liverpool leh Manchester United inkhel tur hi a ni ṭhin. Pathianni zana an inkhel tur pawh a boruak a nep ring suh.

Manchester United manager Jose Mourinho chuan, "Theihtawp chhuahin kan khel dawn a, ka rilru ang pua chak duhna thinlung neite nena khelh ka duh a, ka tumna leh inrintawkna ang hi min ṭawmpui se ka duh a ni," tiin a player-te chu chak tura a rilru puthmang ṭawmpui turin a duh.

Mourinho hian tun hnaiah a player-te a sawisel fo ṭhin a, Champions League-a an match hnuhnung bera Valencia an hneh loh ṭum pawhin, "Ka player-te khelh dan ka hrethiam lo a, a bik takin an khelh tam loh avanga phun reng te khelh dan kha mak ka ti a ni," a ti!

Thawnthu hlui...
United leh Liverpool an intawng dawn a, team pahnih inhal tak an intawn dawn takah chuan thu mu hnu an kai tho a, Jurgen Klopp-a'n Manchester United a hnar thu thlengin an sawi leh ta.

Klopp hian, "Kei chuan khelmual chhung chiah ka ngaihtuah a, a pawn lam sumdawnna leh thil dang hian minti buai ve lo," tiin United a hnar chhan a lo sawi tawh a, "Liverpool nen hi chuan intawng tur renga siam ang mai kan ni," a ti zui.

German coach hnar hnu nih hi United fans tan a 'na' a, chu zawng aia na chu Liverpool a thlang zawk hi a ni - vantlang hriatah a la sawi chhuak zui!

United fan-ten hei vang tak hian tun hnaia che ṭha tak Liverpool kaltluang lai tihtawp hi an duh dawn a, champion beisei ngam tawh lo mah se Reds hneh hi Champions League khelh an tumna kawngah a pawimawh a, an hmelma team champion tur dan nan a pawimawh tel bawk.

Mangṭha sulhnu...
Season hmasa Premier League-ah team pahnih hi vawi hnih an intawng a, Anfield-ah goal khung loa an inhnehtawk hnuin Old Trafford-ah 2-1 in Manchester United an chak zui.

Premier League-a match 52 an intawn tawhah Liverpool hi vawi 13 an chak laiin United erawh vawi 28 an chak thung a, vawi 11 an inhnehtawk. Premier League aṭanga buk lung khai tur a nih chuan United an chungnung zawk tihna a ni.

Mourinho erawhin sulhnuin a puihna tur a hre lo. Portuguese manager chuan, "Kan intawn hnuhnung pali-ah kan tlawm miah lo. Mahse, hun liam taa thil thlengte khan pawimawhna an nei lo a, a pawimawh ber chu Pathianni zanah kan hmaah a inchhawp dawn a ni," a ti.

Chelsea boss hlui chuan Klopp kap zuiin, "Nomawi chawi thei khawpa in ṭha a nih chuan nomawi in chawi ngei tur a ni a, a bik takin in tum ber nomawi chawi a nih thu i sawi chuan nomawi i chawi ngei tur a ni," a ti - Klopp-a'n Liverpool-ah nomawi chawi a la nei lo a, Mourinho erawh vawi thum a champion tawh.

Chhuanlam phawt!
Pathianni zan thlen hma hauhin Mourinho-a'n chhuanlam a nei a, chu chu inhliam a ngah thu a ni. Real Madrid boss hlui chuan, "Valencia-ah khan dam reng chung sia hruai loh ka neih chu David De Gea leh Nemanja Matic te an ni.

"Valencia laka zin lo dang zawng kha an inhliam vek a, tun thleng hian an dinhmun a la chiang lo a ni," a ti a, damkima Liverpool an hmachhawn loh tur thu a sawi. Mourinho hian player hming lam rik nei lo mah se Valencia-a a hruai loh zingah Chris Smalling, Victor Lindelof, Matteo Darmian, Anthony Martial leh Diogo Dalot te an ni.

Liverpool tan chanchin lawmawm lo a awm ve tho a, right back Trent Alexander-Arnold chu hliam vangin a inlan thei dawn lo a, Joel Matip chu inhliam sa a ni a, James Milner dinhmun a la chiang lo bawk - Joe Gomez inhliam lai a ni zui!

United ṭantu te tana thu hriat nuam tak tur chu Liverpool-in tlarhmaa an chhuanvawr Roberto Firmino, Mohamed Salah leh Sadio Mane ten league-a United an hmachhawn minute 855 chhungin goal emaw assist an nei miah lo - Napoli laka khel chau hlim an ni bawk a, United tan duhthlan theih ni se tun season-ah chuan tun hi Liverpool tum hun atana hun duhawm ber a ni.