LeBron aia lian James Harden

Nimin zing NBA regular season inkhelah Houston Rockets chuan Los Angeles Lakers 126-111 in an hneh a, player ṭha leh hmuhnawm bik pahnih awm zingah James Harden a langsar zawk.

Season hmasa Most Valuable Player Harden hian point 50 a score bakah rebounds vawi 10 lain assist ṭum 11 a nei bawk, tun season chhungin triple-double a vawi hnih neihna niin, basketball a khelh hun chhunga a vawi 37 neihna a ni nghal.

Lakers tan LeBron James chu player langsar a ni tho. MVP atana vawi li thlan tawh James hian point 29 nei mah se a team chakpui nan a tawk zo lo. Western Conference table-ah Lakers hi pangana an ni mek a, season bul ṭan fuh lo Rockets erawh 13-naah an la awm thung.

Kum 29 mi Harden chuan, "Kan dinhmun hi thlir chuan kan lungawi thei rih lo, hmasawn tumin theihtawp kan chhuah chhunzawm dawn," tiin playoff khel phak chin pariatna nih phak thuai an tum thu a sawi bawk.