Europe palian Milan an tla

AC Milan chu Europa League group stage paltlang zo loin an tla. European champion vawi sarih ni tawh Milan tan knockout stage luh phak loh hi mualphona a tling. Premier League club Arsenal leh Chelsea te erawh a chung bera awm chungin an tlang.

Europa League last 32 inkhel tur hi December 17 tlai hian pawh a ni dawn a, Gunners leh Blues hian Champions League aṭanga rawn tla team an hmachhawn lo ang. Knockout stage hi nakkum February thlaa khelh tur a ni dawn.

Milan an tla

Group match hnuhnung ber khelh hmain AC Milan hi pahnihna an ni a, an khingpui tur Olympiakos hi pathumna an ni thung. Olympiakos lamin 3-1 a hnehna changin an mamawh zat goal an khung a, head-to-head bika an intluk avangin goal difference hmangin an tlang ta zawk a ni.

Goal hnih tala hnehna chan ngai Olympiakos lamin chawlhlawk hmain goal an khung lo a, minute 60-naah Pape Abou Cisse hmangin an goal khatna an nei chauh.

Milan defender Cristian Zapata-a'n anmahni lama a tih luh zui avangin Greece club hian 2-0 in hma an hruai a, dinhmun himah an awm. Mahse, Zapata hian anmahni lama a tih luh aṭanga second 110 liam hnuah tihsual rulh nan goal khat tauh lut lehin 2-1 a ni chiah - Milan chu dinhmun ṭha zawkah an ding ve leh thung.

European champion vawi sarih ni tawh Milan hi tlang tura ngaih ni mah se minute 81-naah defender Ignazio Abate chuan penalty a chawi, Greek club tan Konstantinos Fortounis chuan chhuih lutin an mamawh zat point leh goal an nei. Kum 2001 hnua a vawi khat nan Milan hian European football an khelh hoah knockout stage an lut phak lo.

Koscielny a dam

Arsenal captain Laurent Koscielny chuan May thla hnua a match hmasa ber turin Qarabag a hmachhawn thei a, Gunners hian Alexandre Lacazette-a goal khat hmangin 1-0 in hnehna an chang.

Group E hmahruaitu Arsenal hi an dinhmun a chian tawh avangin Unai Emery-a'n player ṭha tam zawk a hahchawlhtir a, hliam dam hlim Mesut Ozil chuan Lacazette goal khung tur a siamsak thung; rawlthar beiseiawm Eddie Nketiah goal khung erawh offside vanga pawm a ni lo.

Arsenal tan hnehna chan a lawmawm a, chumi rual chiah chuan kum 33 mi Koscielny a dam hi chanchin ṭha a ni. France internatonal hlui hi season hmasa semifinal-a Atletico Madrid nen an inkhelh ṭuma hliam niin, Qarabag lakah hian minute 72 chhung harsatna nei loin a khel thei tawh.

Koscielny thlaktu Nacho Monreal bakah match nga a khelh loh hnua inlan Ozil te an dam hi Emery tan lawmna tur a tling. A zawna match 22 chhung tlawm lo tawh Arsenal hian league match khel turin Pathianni zan dar 7:00-ah Southampton an lenchilh ang.

Arsenal manager Unai Emery chuan, "Player naupang zawk ten hun ṭha an neih zel a ngai a, match tam tak khelh hmabak kan neih avangin player chhawr theih an tam hi a ngai a ni," tiin a sawi.

Morata a hliam

Chelsea chuan an mikhualna ramah MOL Vidi chu 2-2 in an inhnehtawkpui a, an match hmasa pangaah hnehna an chan vek avangin point 16 hmuin Group L hmahruaitu an ni chiang ta tho.

Maurizio Sarri-a'n an league match hnuhnunga a hman player 10 ngawt siksawi chungin inkhel bul a ṭantir a, heti chung hian Willian, Alvaro Morata leh Cesc Fabregas te an la neih avangin an chhe chuang lo hle.

Blues winger Willian-a goal khung chu rawlthar Ethan Ampadu-a'n anmahni lama a tih luh hmanga sut a nih hnuah, Vidi lamin Loic Nego hmangin hma an hruai zui. Khup hliam vangin Morata lakchhuah a ngai a, amah thlaktu Olivier Giroud chuan an si phurh a sut.

Chelsea boss Sarri chuan, "Player chhawr rim loh an luh hnem avangin a awlsam lo tih chu ka hria, tihsual pawh kan ngah hle. Mahse, goal hnihna kan khung dawna kan thawhrimna kha chuan min ti lawm," tiin a sawi.

Blues hian an legaue match hnuhnung berah Manchester City 2-0 in an hneh thei a, an phur vanglai a ni. Pathianni zan hian Brighton an lenchilh leh nghal dawn a, Nilaini zanah Bournemouth an mikhual zui dawn bawk avangin player siksawi thiam chu a ngai khawp ang.