Odisha-ah Aizawl FC-in goal an chhuah lo

Aizawl FC-in Mizoram Premier League final an khelh hmaa I League match hnuhnung berah India Arrows nen goal awm loin Barabati Stadium, Odisha-ah an inhnehtawk.

Mizo club-in chak hmel an hmuh zawh loh avangin pakuanaah an awm chhunzawm a, Indian Arrows erawh point khat an hmuh zarah Shillong Lajong nen point hmuh zat inang chiah hmu chungin table mawngphah an chhuahsan.

Mizo an tam

Aizawl FC coach Gift Raikhan-a'n captain Alfred Kemah Jaryan chu tlarhnungah hmang nawn ngam loin midfield-ah a sawn hma a, Mizo hlangin tlarhnung a rem.

Goalkeeper-ah Lalawmpuia awm­in, defence laiah Lalhriatrenga leh Hming­thanmawia te an inkawp a, Lalram­hmun­mawia leh Vanlalduatsanga te mual sirah an awm.

Kelkang tlangval Lalkhawpuimawia chu goal khung turin a mal tlat a, Ghanefo Kromah chu a hnung chiahah dahin Leonce Dodoz leh F. Lalremsanga ten a sir aṭangin an nawr a, midfield-ah Alfred leh Paul Ramfangzauva te an inkawp.

Indian Arrows tan Lalengmawia (Apuia) chuan bul a ṭan bawk a, Mizo pakua zetin inkhel bul an ṭan a ni.

A goal lo

First half-ah goal chance hmuh tur awm mah se goal hmuh tur a awm lo. AFC defender Duata chuan Vikram-a a tih tluk avangin box pawn chiahah freekick chawi a, Apuia rawn dingchhuak AFC keeper AwP-a tana dan harsa tur khawpin a pet lo.

Aizawl FC pawhin box pawn chiah aṭangin freekick an hmu chhunzawm a, Paul-a'n petin wall pet per nan a hmang. Mizo club-in inkhel an thunun thei lo a, Indian Arrows zawkin goal hlauhawm nei lehin Rahim Ali ball tauh chu goal zawnah a kal lo.

AFC an vanduai

Second half-ah Aizawl FC an dang daih a, an goal bawh a na hle. Amaehrawhchu goal hmaah an finishing a ṭha lo a, an vanduai tel bawk.

Ṭan phatah goal khung theihna hun ṭha neiin Kolasib tlangval Paul-a'n a hmang ṭangkai thei lo a, Dodoz pawhin keeper chiah a hmachhawn hnuah goal zawnah a pet lo. Box pawn chiaha freekick an hmu a, Paul-a bawkin petin Deepak Tangri-a kut fuh mah se referee-in penalty a pe lo.

Indian Arrows defender Anwar Ali a khel ṭha a, Dodoz-a cross Remsanga ball tauh chu goalline aṭangin a pet chhuak. AFC penalty shout vawi hnihna pawh penalty pek a ni lo a, Remsanga ball pet chuan Deepak Tangri kut per a nawn leh a, referee a ngawi tlat.

Mualneitu lam pawhin chance an nei a, Boris-a'n goal chance insiam chawpin crossbar a pet per a, goal se chuan Aizawl FC tan thawhchhuah ngaihna a awm tawh lo. Hun tawpah Mizo club-in chance an nei leh a, substitute David Lalrinmuana'n ṭha takin la thla mah se goal zawnah a pet lo a, goal lut loin inkhel a tawp.