Tuikual leh BCA an hmuhnawm

Mizoram Super League final game 2-ah Tuikual South chuan hun tawp dawna Desmond Antwine Medder-a free throw luh hmangin Zarkawt BCA chu 95-93 in an hneh let a, nizan khan game 3 khelh niin result kan hre hman lo.

Ningani zan khan Hawla Indoor Stadium, Republic Vengthlangah Tuikual South tan Desmond-a'n basketball hmuh-nawm a lantir a, point 40 a score bakah rebounds vawi riat lain Player of the Night atan thlan a ni a, American tlangval hian game 1-ah khan point 46 ngawt a score tawh bawk.

Phengphehlep captain F. Zodinthara leh tual-chhung player ṭha Lalrina Renthlei innawk vel a hmuhnawm a, quarter hmasa berah BCA hian point 10-a hma an hruai fal tih mai loh chu kalfal thei an awm lo.

Ningani zan khan hun tawp nan second 15 bawr chauh a awm tihin score chu 93-93 a ni a, Tuikual South lamin ball changin an hmanhmawh lo. Second khat chauh a awm tawh tihin Desmond chuan 3-points attemp a nei a, hei hi BCA lamin dan an tumna lamah an foul.

Desmond-a'n 3-points shot a neih hmasa panga a lut vek a, a laka BCA player te an foul hi a mak lo; chutih rualin free throw a luh vang erawh chuan game 3 khelh a ngaih phah.

Zarkawt BCA hi an champion leh a nih chuan a zawna a vawi hnihna tur niin, Phengphehlep an chak a nih erawh chuan MSL champion thei team palina an ni chiah ang.