Pep-a City leh Everton an inhal

Manchester City-in season liam ta khan hnehsawh takin Premier League nomawi an chawi a, Pep Guardiola hnuaiah football kalhmang thar khelin champion nawn thei tur khawpin an ṭha tih a lang.

Amaherawhchu City hian league match hnuhnung berah Chelsea an hneh lo a, Liverpool lamin season ṭha tak an hman bawk avangin 'English football an thunun' a tih theih ta lo a, Everton nena an record thlir kirin point hloh thei dinhmunah an ding bawk.

Zanin dar 6:00 hian City-in Etihad Stadium-ah Liverpool khaw club Everton an mikhual dawn a, Pep-a hian City a enkawl hnuah Toffees hi league-ah ṭum hnih mikhual tawhin an inhnehtawk ve ve.

Spanish manager hian Goodison Park a tlawh hmasak ber ṭum pawhin Everton hian 4-0 in an hneh a, Pep-a'n manager hna a chelh hnua a tlawm chian ber a ni. A êng zawnga thlir erawh chuan season liam taa an champion ṭum kha chuan Goodison Park-ah 3-1 in hnehna an chang a, Pep-a hnuaiah City-in Toffees vawi li an hmachhawnah vawi khat chiah an hneh tihna a ni bawk.

Pep-a enkawl City leh Everton te hi an inhal tiin a sawi theih. Chutihrualin match li chhung ṭhal na vanga khel thei tawh lo Sergio Aguero bakah Fernandinho leh Danilo te chhawr theihin an awm a rinawm tawh a, David Silva leh Kevin De Bruyne te la dam hman lo mah se City chu chak zawk tura rinkai an ni ang.