Wilder hmachhawn duhtu Anthony Joshua

British boxes Anthony Joshua chuan April-ah WBC heavyweight champion Deontay Wilder hmachhawn a duh thu a sawi a, "He game thununtu chu keimah ka ni," tiin a cho hle.

Kum 29 mi Joshua hian IBF, WBO leh WBA title a kawl mek a, Wilder nen an inhmachhawna chak zawk chuan heavyweight boxing-a title liantham chu an kawl vek dawn tihna a ni.

Wilder chuan tun kar tir khan Joshua team ten inhnekpuiah an sawm thu a sawi a, he boruak karah hian British boxer chanchin ngah Tyson Fury chuan thu leh hla a lo nei ve reng bawk.

Mahse, Joshua chuan Fury hmachhawn tumna erawh a neih loh thu sawiin, "Tyson Fury hi champion a ni lo a, hmachhawn chakna ka nei lo," a ti a, Joshua promoter Eddie Hearn chuan Wilder thutluknaah engkim a innghah tawh thu a sawi.

Joshua chuan, "Wilder hi April 13-a inhma-chhawnpui ka duh a, heti bak hian sawi ngaihna ka hre tawh lo. World title kawl pawh nei lo Tyson Fury hmachhawn a duh zawk a ni.

"Wembley ka book vek tawh a, a hun tur kan tichiang vek tawh a, mi zawng zawng hmaa sawi ka duh chu heavyweight tu emaw ber hmachhawn ka duh a, a bik takin champion lai Deontay Wilder hi hmachhawn ka duh a ni," a ti a, American boxer nen nakkuma inhmachhawn ngei a duh.