Chhinga Veng leh Aizawl FC champion ringtu inzat

Mc Dowell's No. 1 Soda Mizoram Premier League Season 7 thlirlawk nan Vanglaini chuan MPL coach te ngaihdan a la a, Chhinga Veng leh Aizawl FC champion ringtu pathum ve ve an awm.

Tun season-a final-a inhmachhawn tur Chhingcows leh AFC hi league round-ah pawh an intluk tawk viau a, vawi hnih an inhmachhawnah an inhnehtawk ve ve. Chhinga Veng hi Chanmari FC, Electric Veng leh Chawnpui FC coach ten chak zawk turah an dah a, Mizoram Police, Ramhlun North leh Bethlehem Vengthlang coach ten Aizawl FC chak turah an dah thung.

Champion nawn an ring

Chanmari FC coach Chawngthansanga chuan semifinal-a an hneh loh Chhinga Veng a dah sang zawk. Chawnga chuan, "Aizawl FC hian duhthusamin inpuahchahna an kalpui thei lo a, I League khela an zinchhuah reng avangin an tan a harsa dawn. Chhinga Veng chuan ṭha takin inbuatsaihna a nei thei a ni. Chutihrualin MPL-a chhawr tur zin ve lo a, an awm a, an intluk tawk viau ang. Result chu 2-0 a nih ka ring," tiin a sawi.

Electric Veng coach Vanlalsawma Colney pawhin Chanmari coach ngaihdan a ṭawmpui a, Sawma chuan, "Aizawl FC player zin ve lo ten training an nei reng a, an tam lo thung. Final a nih tawh avangin risk a lak ngam chi a ni dawn lo a, zin lo zingah pawh hian first eleven chang pha lo an awm ang. Chubakah Chhinga Veng hi an vannei em em a, an vannei leh turah ka ngai. An thawkrim bawk a, vanneihna hi an lamah an ṭan tlat avangin 2-1 in an chak mai ka ring," tiiin league round hmahruaitu a rin chhan a sawi.

Chawnpui coach Laldinthara chuan ,"Aizawl FC hi an squad a chhah ṭha a, amaherawhchu I League khel tura zinchhuah hi MPL final thlir chuan an ṭhat pui ka ring lo. Chuvangin Chhinga Veng hi 2-1 in an chak turaah ka ngai," tiin Chhingcows a dah san chhan a sawi.

AFC tan nomawi 3-na

Mizoram Premier League-ah vawi thum champion thei an la awm lo a, Aizawl FC tan tun season hi lungthu kim theihna hun ṭha a ni.

Mizoram Police coach Lalbiaksanga Colney chuan, "Midfield-ah an in chak hleih deuh a, chuvangin final-ah Aizawl FC hi an ding chang ang. An inthlauhna erawh a tam a rinawm loh a, 2-1 in inkhelh a tawp ka ring," tiin a sawi.

Ramhlun North coach Laltlantluanga Hnamte pawhin, "Aizawl FC hi 2-1 a an chak ka ring. MPL bikah hian team dang daih an ni a, season tawp lamah an che ṭha em em a, final-ah pawh an chhawm theih ka ring," tiin I League club a rin zawk thu a sawi.

Bethlehem Vengthlang coach H. Lalhlimpuia chuan, "MPL-ah hian an rilru an pe viauin ka hria. I League-a an result aṭangin Aizawl FC hi teh chi an ni lo. An squad a chhah a, MPL hnuhnung lamah an result ṭha zawng zawng nen AFC hi 1-0 in an chak ka ring," tiin a sawi.