Champions League Knockout Round

UEFA Champions League round of 16 draw chu Thawhṭanni tlai dar 4:30 hian Nyon, Switzerland-ah neih a ni dawn. Knockout round-ah hian England-in club pali an thawh a, Germany leh Spain ten pathum ve ve an thawh a, Italy leh France ten pahnih ve ve thawhin Netherlands leh Portugal ten pakhat ve ve an thawh bawk.

Last 16-ah hian group stage-a pakhatna leh pahnihna an inhmachhawn dawn a, chutihrualin knockout stage hmasa berah hi chuan ram khat club an inhmachhawn thei lo a, group stage-a an awm pui nen pawh fuh thei a ni lo bawk. Premeir League champion lai Manchester City hian pahnihnaa awm Liverpool, Manchester United leh Tottenham Hotspur te an hmachhawn thei lo a, Pep Guardiola hmachhawn theih chu Ajax, Atletico Madrid, Roma leh Schalke te an ni a, round sang zawk thleng turin an dinhmun a ṭha hle.

Hetihlai hian group hmahruaitu ni pha lo Liverpool chuan Real Madrid, Barcelona, Bayern Munich leh Juventus te an hmachhawn thei dawn tihna a ni a, quarterfinal kalkawng a harsa dawn. Chutihrualin Reds hi an vanneih chuan Borussia Dortmund leh Porto te nen pawhfuh theih an ni a, hei hi a thleng a nih chuan rinkai zawk chu a ni ngei ang.

Round of 16 hi February thlaah khelh tur a ni a, first leg hi 12/13 a khelh tur niin second leg hi 19/20 ah khelh a ni ang. Quaterfinal aṭang chuan ram khat club pawh an inhmachhawn thei a, season liam taah pawh khan Liverpool-in Man City chu aggregate-ah 5-1 laiin an hneh a ni.

Champions League last 16-ah hian video assistant referee (VAR) chu Europe-a club inelna sang bera a vawi khat nan hman ṭan a ni ang.