Spanish La Liga - a ngaihnawm vanglai!

Season dang zawng aiin Spanish La Liga a ngaihnawm a, hei hi a chhan ber chu Barcelona, Atletico Madrid leh Real Madrid-te an chet chhiat rual vek vang a ni!

Barca hi table chung berah awm mah se an hnuai chiaha awm Sevilla aia an sanna hi point thum chauh a ni a, palina Real Madrid aia an sanna pawh point nga bak a ni lo.

Atletico Madrid hi pathumnaah daih awm mah se Barca aia an hniamna chu point thum chauh a ni a, a hrilhfiah dan awlsam berah chuan Spanish club lian ten champion beiseina an la nei vek.

Barca pawh hi...

Real Madrid che chhiain sawi a hlawh a, team dang an chuti 'teh' lua bawk si loh avangin Barcelona-in La Liga-ah hma an hruai mek - a nihna tak en chuan Barca hian season dang an phak lo hle.

League match 15 an khelh tawhah vawi hnih an tlawm tawh a, vawi li ngawt an khingpui an inhnehtawkpui - mahse Real chet chhiat leh Atletico fuh bik loin Barca dinhmun chhe tur a humhim chauh niin a lang.

Barcelona hian Pathianni zan dar 1:15-ah Levante an lenchilh dawn a, fal taka hmahruai duh tan chak loh a thiang lo ang.

Real ve thung

Santiago Solari hnuaia insiam

ṭhat tum mek Real Madrid hi CSKA Moscow laka 0-3 a tlawm hlim an ni a, fan-ten inkhelh zawhah an au el hial.

Zanin dar 11:00-ah Rayo Vallecano an mikhual dawn a, an tlawm leh a nih ngat chuan Real fan-ten an hrethiam tawh lo ang - Real Madrid hian an league match hnuhnung pathumah vawi hnih hnehna an chang a, vawi khat an tlawm - goal thum an chhuah a, goal thum an khung!

Beisei dang

Atletico Madrid-in league match 15 an khelh tawhah vawi sarih ngawt an khingpui an inhnehtawkpui a, Barca leh Real beisei phak lohna an chhawr ṭangkai hleithei lo.

Diego Simeone-a team-te hian zanin dar 8:45-ah Real Valladolid an lenchilh dawn a, hnehna an chang a nih chuan Pathianni zana inlan ve chauh tur Barcelona nen an point hmuh zat a in ang chiah ang - hei hian an tana nomawi la hnaih zia a hrilhfiah.