Bengaluru ngam thei an la awm lo

15th December, 2018

Indian Super League khelh mekah Bengaluru ngam thei an la awm lo a, Ningani zan khan an mikhual ATK chu 1-0 in an hneh; league match 11-ah an tlawm tawh lo!

Bengaluru tan Erik Paartalu chuan minute 37-na lekah goal hmahruai a khung a, Kolkata club-in Balwant Singh hmangin vawi hnih ngawt sutna remchang nei mah se Mohun Bagan striker hlui hian a hun ṭha neih a chhawr thei lo a, a tawpah a team-in an tuar.

ATK tan ṭum dang ang bawkin Ricky Lallawmawma chuan inkhel bul a ṭan a, Bengaluru lamah Sairuatkima chuan bench lamah hun a hmang tluan thung.

Zanin dar 7:30-ah inkhel pakhat a awm dawn a, beisei ang result nei thei lo pahnih Chennaiyin FC leh Delhi Dynamos an intawng dawn.

Pathianni zan dar 7:30-ah inkhel pakhat a awm ang a, Mumbai City chuan Kerala Blasters an mikhual thung ang.