Lloris leh Son an intibuai

Tottenham leh Everton inkhela langsar ber chu first half tawp chiaha captain Hugo Lloris leh forward Son Heung-min te innawr buai chu a ni a, football-ah chuan hetianga mahni teammate-te nena intihbuai hi a awm leh zauh ṭhin. Spurs manager Jose Mourinho chuan half time laia thil thleng chu thil mawi tiin a sawi hlauh a, team ṭhat zel nana pawimawh a nih thu a sawi tel bawk. 

Referee-in first half a ham tawp chiah tihin Lloris-a'n South Korean star Son a pan phei nghal a, Spurs keeper hian va nam nghal mah se Giovani Lo Celso leh Moussa Sissoko te an inrawlh vat. French keeper inhrosak a tum viau nachungin Harry Winks-a'n a dang bet a, Son a inthiar fihlim vat bawk avangin buaina lian tham a thleng lo.

Lloris lungawi loh chhan hi eng dang a ni lo a, Son hian goal venhim kawngah a tihtur a ti tawk loah a ngai. First half tawp hmain Everton forward Richarlison-a'n chance ṭha a nei a, Spurs captain hian Son hi a ven tur a veng tawk loah a ngai. Second half ṭan dawnah erawh Son leh Lloris te an inkuah leh tawh a, boruak a ṭha. Hun chanve hnu lamah Spurs tan Son-a'n chance a ngah ber a, goal khung lo mah se an chet dan aṭangin Lloris nena an inkar chu a felah a ngaih theih.

Tottenham captain Lloris chuan, "Inthlakna room-a thil thleng tur a ni a, kei leh Sonny inkara thil thleng kha football-ah chuan a thleng ve chawk. Inkhelh tawpah kha chuan inhmuh ang khan kan lawm tih piah lamah a ni," tiin chak duh vang a nih thu a sawi a, engmah inhuatzuina a awm loh thu a sawi bawk. Spurs hian Everton an hmachhawn hma hian Sheffield United 3-1 in an hneh lo a, Jose Mourinho-a'n player-te rilru put hmang inenfiah turin a ti. Portuguese manager chuan, "Ka naute chungah hian beiseina ka nei sang em em a, an theihna ang hian an khel ṭhin loin ka hria. Player-te ka hrilh a, team tana thawk nasa lehzual turin ka hrilh. Son hi player ṭha tak a ni a, tupawhin an ngaina. Amaherawhchu a khelh danah captain a lungawi pha lo a, kha aia ṭhaa khelh kha a beisei a ni," tiin thil thlen dan a sawifiah.

Premier League-a bul a ṭantirha 'The Special One' inti ngam ngat Jose Mourinho chuan, "A chang chuan khatiang kha team ṭhan nan a pawimawh a, hmasawn tur chuan rilru put hmang a dik a ngai. Khatia han rik deuh ṭhat kha chuan ka naute chungah rinhlelh tur a awm lo," tiin buaina karah a naute a fak a, thil thlen danah dem tur an awm a nih chuan mawhphurtu a nih thu a sawi bawk.