Man United tan chak a pawimawh

UEFA Champions League-ah zanin dar 1:30 hian Manchester United-in Istanbul Basaksehir an mikhual dawn. Ole Gunnar Solskjaer hote hian khualmualah Turkish club hi an hneh lo a, hmabak harsa zawk pumpelh nan Old Trafford-ah team nem ber anga ngaih hi hneh ngei a ṭul. 

Group H inkhel dangah PSG-in zanin dar 1:30 vek hian RB Leipzig an mikhual dawn. German club hian an mualah French champion hi an hneh a, nikum UCL finalist PSG tan knockout stage lut turin point thum hlawhchhuah a ngai bawk.

Manchester United-in November thla tirah Istanbul Basaksehir an tlawh a, Turkish club lakah 2-1 in an tlawm. Ole Gunnar Solskjaer-a hote chak loh dan hi a mualpho thlak hle. Basaksehir tan Demba Ba-a'n minute 12-naah a khung a, Chelsea striker hlui goal khung tur siamsaktu Edin Visca-a'n minute 40-naah a khung belh.

Ba-a'n goal a khung hian Man United player zawng zawng chu an chhuak vek. United midfielder hlui Paul Scholes chuan kum 10 hnuai lam goal venhim dan nen a khaikhin a, striker hlui Robin van Persie pawhin a la hmuh ngai loh thu a sawi.

Instanbul club hi kum 1990 khan din ṭan chauh a ni a, Instanbul Basaksehir hming a put phei chu kum ruk liam ta chauh kha a ni. Tun season hi Champions League an vawi khat khelhna a ni a, Man United lakah chiah goal an la khung a, English club chiah hi hneh an la nei a ni.

Manchester United hian Turkish club an hmachhawn hnuah Everton (3-1) leh West Brom (1-0) te an hneh a, an khelh danah erawh inchhuanna tur a awm lo. West Brom an hneh zawh hian United midfielder Nemanja Matic chuan goal hmaah tun aia an hriam a ṭul thu a sawi a, Serbian midfielder hi tumahin an hnial lo ang.

Man United tan tun season-ah Marcus Rashford leh Bruno Fernandes ten goal sarih ve ve an khung a, Portuguese midfielder hian penalty aṭangin goal li a khung. Rashford tih loa United tana goal khat aia tam khung chu Anthony Martial, Juan Mata leh Mason Greenwood te an ni a, goal hnih ṭheuh an pet goal.

Uruguayan striker Edinson Cavani-a'n khelhna hmun a chang tam lo a, goal khat chauh a la khung. Solskjaer-a hote goal nawr a na tawk lo a, striker chauh dem a rem lo. Ball semtu lam pawh dem theih a ni.

United chhuan tawlawl Bruno pawhin pass sual a nei fo a, Fred leh Scott McTominay te ball a fing tawk lo a, Matic lah a ṭuan fum ta. Baggies lakah Solskjaer-a'n pound maktaduai 35 man Donny van de Beek aiin nikuma league-a vawi 19 chiah a chhawr Juan Mata a la thlang zawk. 

Theihna nei sang Paul Pogba-a'n United kawr nen a thiamna tak a pholang ṭhin lo bawk nen Norwegian manager-in Istanbul Basaksehir laka player a thlan dan tur hi hriat a châkawm hle.

Basaksehir coach coach Okan Buruk chuan, "Man United kan hneh avangin knockout stage lut turin beiseina kan nei," tiin a sawi. Buruk-a thusawi a dik a, Turkish club-in beiseina an neih rual chiah hian English club pawhin tlak theih dan a nei ve nghal.

Zanin inkhel result hian nghawng thui tak a nei dawn a, Man United-in point thum an hmu chhuak lo a nih chuan PSG leh RB Leipzig an la hmachhawn dawn avangin hmabak a harsa ṭalh ang.