Mizoram Lockdown (inkharkhip) Ni 108

France football legend Zinedine Zidane-a'n a vanglaiin ram tan match 108-a khel hman a, goal 31 a khungsak. Zidane hian kum 1998 khan France tan hian World Cup nomawi a chawi a, kum 2006-ah final khelhpuiin inkhelh 

a chawlhsan. Euro 2000-ah khan France hi a champion pui bawk a, FIFA World Cup All-Star Team-ah kum 1998 leh  2006 khan a lang a, kum 2006 World Cup-ah hian Golden Ball a dawng bawk. 

Zidane hian French club Cannes-ah a career ṭanin season li a khelhsak a, kum 1992 khan Bordeaux-a zawm. Bordeaux hi UEFA Intertoto Cup-ah kum 1995 khan a champion pui a, khawvel hriat a hlawh ṭan. Kum 1996-ah Juventus a zawm a, Italian club tan season li khelin Serie A (2), Supercoppa Italiana (1), UEFA Super Cup (1), Intercontinental Cup (1) leh UEFA Intertoto Cup (1) nomawi a chawi a, kum 2001 khan a hunlaia footballer manto ber ni turin euro maktaduai 77.5-in Real Madrid a zawm. Real tan season nga khelin a hun tawp a hmang a, Spanish club ropui tan La Liga (1), Champions League (1), UEFA Super Cup (1), Intercontinental Cup (1) leh Spanish Super Cup (2) nomawi a chawi. Zidane hi FIFA FIFPro World XI-ah vawi hnih ngawt a lang a, FIFA World Player of the Year-ah vawi thum thlan a ni a, Ballon d'Or vawi khat a dawng bawk.