Judgement Night - Zaninah MPL7 final Chhinga Veng Vs Aizawl FC
Mizoram chhunga football club ṭha ber chu zanin hian a hriat dawn ta. MPL champion lai Chhinga Veng FC leh vawi hnih champion tawh Aizawl FC te bukin an awm dawn a, chuvangin tualchhung football club lian pahnih tan zanin hi 'Judgment Night' a ni.
Mc Dowell's No. 1 Soda Mizoram Premier League Season 7 final hi zanin dar 8:00-ah khelh a ni dawn. Season liam ta final-ah Chhinga Vengin I League club AFC hi hnehin an club history-a a vawi khat nan MPL nomawi an chawi a, tun ṭuma champion tur erawh final-a che ṭha zawk a ni ang.
Intum tawk
MPL7-ah Chhinga Veng leh Aizawl FC te league round-ah vawi hnih an inhmachhawn a, an intum hmasak zawkah goal awm loin an inhnehtawk.
Round 11-a an inkhel tur chu AFC-in I League an khelh avangin league round khar nan hman a ni a, hetah pawh hian chak zawk awm loin 1-1 in an inhnehtawk.
MPL ṭan hmain I Day Football final-ah an intawng a, MS Dawngliana goal hmangin Chhingcows 1-0 in an chak. Chutihrualin an intawnna hnuhnung pahniha an intluk tawk miau avangin final-ah pawh Chhinga Veng dah san zawk a rem lo.
Aizawl FC an lian zawk...
Chhinga Veng coach Lalsangzuala Hmar chuan, "Chhinga Veng leh Aizawl FC hi khaikhin chiah ka ruat lo. AFC chu I League club an ni a, I League best coach an nei a, foreigner ṭha pahnih Alfred leh Kromah an kawl bakah Mapuia leh Rinchhana Tochhawng te an nei a, team ṭha zawk an ni," tiin an khingpui tur a dah san thu a sawi.
Sanga chuan sawi chhunzawmin, "Mi ṭhenkhat chuan Aizawl FC-in I League khela an zin chhuah avangin an dinhmun a ṭha lo niin an sawi a, an ngaihtuah chiang lo a ni. AFC kha inkhel tura zin an ni a, inpuahchahna ṭha takin an nei reng tihna a ni. Keini tan erawh club dang practice pui tur an awm tawh lo a, kan duh aia rei kan chawl a, kan forward Gatch pawh a visa zawh avangin final-ah kan chhawr thei lo," tiin Vanglaini a hrilh.
Chhingcows thlirna a dikna chen a awm a, chutih rualin final khelh hauh hmain ṭawngkam lama inbeihna a inṭan nghalah a ngaih theih bawk.
Chhingcows pawh an lian
Chhinga Vengin season liam ta khan Aizawl FC chiah an hneh lo a, MFA hnuaia nomawi chawi theih pathum MPL, I Day Football leh MFA Super Cup-ah an champion vek bawk.
Tun season-ah Chhingcows squad pan hret mah se coach Sanga leh a thawhpuite thawhrimna zarah I Day Football leh MFA Super Cup-ah an champion nawn.
MPL chhiar telin inelna pathumah Chhinga Veng hian Mizoram Police chiah tun season-ah hneh loh an nei a, Sanga kaihhruaina hnuaiah hrim hrim vawi hnih chiah an chak loh avangin 'record' ringawt thlir chuan champion lai buk a rit zawk niin a lang.