Final-ah engtin nge an inrem dawn?

MPL7 semifinal second leg-ah Chhinga Vengin Gatch Arthur Diomande chu tlarhmaah an maltlat tir a, Ivorian forward hi MS Dawngliana leh F. Lalnuntluanga ten a sir ve ve aṭangin an thlawp. Midfield-ah Lalmuansanga leh Lalrinchhana te an inkawp a, Lalromawia chu forward hnungchiahah dah a ni. Tlarhnungah Vanlalzuidika leh PC Laldinpuia te an inkawp a, Vanlalchhuanga leh Hmingthanmawia chu wing back-ah awmin goalkeeper chu Zothanmawia a ni.

Coach Lalsangzuala Hmar-in final-ah Gatch-a an chhawr theih loh tur thu a sawi avangin Ivorian forward hi an thlak ngei a ṭul dawn. Thlakna tur player an nei ṭha a, chhar theih turin Lalrammawia, Lalrammuanpuia leh Lalremruata te an kawl a, Dawngtea a laia dah lutin mual sir lamah Lalsawmzela an hmang thei bawk.

Duh thlan tur tam tak zingah tawnhriat nei ṭha Rammawia a thlan a rinawm. Tlarhnung lam erawh khawih chetna tur a awm rualin coach Sanga hian a rin ngai bawk a rinawm a, midfield-ah erawh tawnhriat nei ṭha Jacob Lalrawngbawla a rawn inlan nawlh a nih pawhin a mak lo ang. Chhinga Vengin veng mipui ṭan chhan tur an nei a, team thawhhona a ṭhat bawk avangin final zana entu an tam zawk chuan an dinhmun ṭhatna a belhchhah ang.

Aizawl FC-in semifinal second leg-a Mizoram Police nen an inkhelh ṭumin foreigner pahnih Alfred Kemah Jaryan leh Bektur Talgat Uulu ten bul an ṭan. Goalkeeper-ah Lalawmpuia'n bul a ṭan a, defence-ah Lalrinchhana Tochhawng leh Lalhriatrenga (Achia) te inkawpin SR Lallawmawma leh Lalbiakzuala mual sirah an awm.

Midfield-ah hian foreign pahnih pui turin Hmangaihkima a awm a, Vanlalduatsanga leh Rochharzela te mual sirah awmin tlarhmaah F. Lalremsanga a mal tlat. Starting eleven 11 zinga paruk zet hi thlak danglam theih niin a lang a, tawnhriat nei ṭha thlakna tur an awm avangin eng emaw zat an thlak danglam a rinawm a, hei hi final ngaihnawmna belhchhahna tur a ni.