ISL mawitu Mizo tlangval

Inrinni zan Indian Super League inkhelah Mizo hming a mawi a, Daniel Lalhlimpuia, Lallianzuala Chhangte leh Isaac Vanmalsawma ten mimal lawmman an dawng vek!

Tun season-a chak la nei miah lo Delhi Dynamos chuan beisei phak lo Chennaiyin FC an mikhual a, 3-1 in an hneh - Delhi chak nan Mizo player pahnih an thawhhlawk hle.

Serchhip tlangval Daniel Lalhlimpuia chuan ISL-a a goal hmasa ber khungin minute 16-naah goal hmahruai a khung a, Chennaiyin tan penalty aṭangin Raphael Augusto chuan a sut.

Delhi tan Mizo bawk an ṭangkai nawn - Lallianzuala Chhangte chuan Bikramjit Singh goal khung tur siamsakin minute 78-naah hma an hruai nawn a, minute li hnuah Nandhakumar chuan chak nemnghehna goal a khung zui.

Limitless Player of the Match atan Daniel chu thlan a ni a, Winning Pass of the Match chawimawina nen Lianzuala a haw thung. Isaac-a'n Chennai club tan point hlawh chhuak zo lo mah se a thawhrimna erawh hmuh hmaih a ni lo a, Emerging Player of the Match-ah thlan a ni.

Zirtawpni zan khan FC Goa chuan an mang ram aṭangin NorthEast United an kai harh a, 5-1 ngawtin an sawp. Goan club tan Ferran Corominas chuan goal hnih a khung a, Edu Bedia, Hugo Boumous leh Miguel Fernandez ten goal khat ṭheuh khungin Guwahati club tana Bartholomew Ogbeche goal khung chu mualpho zualpui khuhna chauh a ni tawh.

NorthEast United tan Robert Lalthlamuana chuan inkhel bul ṭanin Lalṭhathanga chu bench aṭanga luhtir a ni thung.