Goal 5000-na khungtu Ronaldo

Juventus chuan Cristiano Ronaldo-a penalty chhuih luh hmang-in Torino 1-0 in an hneh a, Juve hian Serie A bikah goal 5000 an khung tling ta chiah - season kal laiah hmahruaitu an ni chhunzawm zel bawk.

Inrinni zan Italian Serie A inkhelah Juventus lamin goal an khung thei mai bik lo, khualmualah an chak zo dawn lo niin a lang hman. Mahse, substitute goalkeeper Salvador Ichazo-a'n Mario Mandzukic a tih tluk vangin penalty a chawi.

Penalty pet turin Portuguese forward Ronaldo a rawn ding chhuak a, minute 70-naah goal awmchhun khungin a club a chakpui. Real Madrid hmatawng hlui hian a club thar tan match 15 an khelh aṭangin league bikah goal 11 a khung tling leh der tawh.

Massimiliano Allegri naute hian season kal laiah point 48 hmuh tur awm zinga 46 an hmu thei a, anmahni hnaih bertu Napoli aiin point 11 zetin an sang fal. Mahse, Napoli hian match khatin an khel tlem zawk, an inthlauhna hi danglam leh thei a ni.

Inkhel dangah Inter Milan chuan minute 76-naah Mauro Icardi penalty chhuih luh hmangin Udinese 1-0 in an hneh a, pathumna an nih chhunzawm. Inter hi Champions League group stage aṭanga tla hlim an ni a, season tharah European football inelna sang ber khelh leh an duh a nih chuan pathumna chinah tal an awm a ngai dawn.