Sindhu hun a her chhuak ta

PV Sindhu chuan tun hma lama a dai ngai loh ram a dai chhunzawm leh ta. Sindhu hian nimin khan 2017 world champion Nozomi Okuhara hnehin a vawi khat nan World Tour Finals nomawi a chawi.

Guangzhou, China-a inkhelah Sindhu hian straight game in hnehna a chang a, India mi zingah BWF World Tour Finals title la hmasa ber a ni. Japanese nula lakah hian darkar khat leh minute hnih chhungin 21-19 21-17 in hnehna a chang.

Rio Olympic silver medalist Sindhu hian a zawna a kum thum nan BWF World Tour Finals hi a khel a, nikum khan nomawi inchuhna inkhelah Japanense player tho Akane Yamaguchi hneh lo mah se kuminah erawh a tan hun ṭha a inherchhuak ve ta a ni.

Kum 2011 khan Saina Nehwal chuan World Super Series Finals hi a khel tawh a, doubles player Jwala Gutta leh V Diju te chuan 2009 khan pahnihna dinhmun an luah tawh bawk. Player ṭha bik inelna huangah Indian shuttler ten ropuina chang mai thei lo mah se Sindhu hian tih theih loha ngaih chu a rawn ti.

Tun season chhungin Sindhu hi - Indian Open, Commonwealth Games, Thailand Open, World Championship leh Asian Games-ah te pahnihna a ni vek a, atan kum ṭha lo ni dawnin lang mah se inelna ngaihhlut tak mai pakhat BWF World Tour Finals title a lak avangin season kharna duhawm tak a ni ang.