Rocky tan Canelo a u mah mah

Nimin khan mipui nghahhlelh inhnekah Saul 'Canelo' Alvarez chuan awlsam takin Rocky Fielding chu round thumnaah a tuk thlu a, WBA world super-middleweight champion a ni ta.

New York khawpuia boxer pahnih inhnek hma hauh hian Saul Alvarez hi chak tura rin sa zawk a ni a, amah ṭantute beiseina a ti thlawn lo - round thumnaa Rocky a hnek thluk hma hian vawi thum a hnek tlu hman!

Boxer huaisen Rocky Fielding tan Mexican boxer hi a la 'sang' mah mah rih niin a lang a, an inhnek hmain khawvel barakhaih a tum thu sawi mah se an 'quality' a inthlauh em avangin a tum a hlen zo ta lo.

Canelo Alvarez chuan, "Ka vanneihna belhchhah turin min attack a, kha kha a tihsual lian ber a ni ta a ni," tiin Rocky-a huaisen lutuk chu a chak chhanah a ngai.

Kum nga chhung atana pound maktaduai 278 man hu contract ziak hlim Alvarez tan Rocky hi contract a ziah hnua a fight leh hmasak ber a ni a, a hmuna inhnek entu IBF world middleweight champion Daniel Jacobs chuan Alvarez hmachhawn hi a duh thu a sawi.

Fielding hma hun a chiang bik lo a, July thlaa khawvel barakhaiha Tyron Zeuge hneha world title hlawh chhuaktu boxer hian vawi 29 inhnek a hmachhawna vawi hnih a tlawmna chiah a ni.