Real chhanhimtu sawisel hlawh Courtois

Real Madrid a pan hnua sawisel hlawh tak Thibaut Courtois chu Inrinni zan khan European champion chhanhimtu a ni a, injury time-ah save ṭha tak vawi hnih a neih zarzoin Real Madrid chuan 1-0 in Rayo Vallecano an hneh.

Santiago Bernabeu-a inkhelah hian Real Madrid tan Karim Benzema chuan minute 13-naah he inkhela goal awmchhun hi a khung a, goal luh hma dan ngaihtuahin Real hi awlsam takin an chak dawn niin a lang.

Mahse, goal hmaah Real an vanduai chhunzawm a, injury time a thlen meuh chuan Madrid khaw club hi Courtois chet ṭhat zarah team 'vannei' tia sawi an ni ta zawk.

Inrinni zan inkhel dangah Madrid khaw club tho Atletico Madrid chuan hnehna an chang ve bawk a, an mikhualna ramah Antoine Griezmann goal hnih khung hmangin Real Valladolid chu 3-2 in an hneh.

Hmalam panin...

Santiago Solari hnuaia insiamṭhat hna thawk mek Real Madrid-in Argentine manager hnuaia league match ruk an khelhah vawi khat chiah an la tlawm avangin hmalam an pan zel a, champion an sawi ri ngam ve leh ta.

Real tan chanchin lawmawm lo erawh a awm belh zel - he inkhela goal awmchhun khungtu Benzema chu hliam vangin lakchhuah a ngai a, hun tawp lam minute 12 chu khelmualah a inlan thei lo. Real hian hliam vangin Gareth Bale chu an chhawr thei lo bawk.

Rayo lakah Real an vanduai tiin a sawi theih - Lucas Vazquez shot chu line aṭangin petchhuah hman a ni a, Toni Kroos chuan post a pet per laiin Sergio Ramos goal khung chu offside vanga pawm a ni lo thung.

Real tana lawmna tur erawh minute 92-naa Courtois che fuh kha a ni - Belgian keeper hian Alex Alegria bicycle kick ṭha tak chu ṭha zetin a dan sak a, a per lehlam changtu Velazquez tan lah hming chherna hun a siamsak duh lo a, Manchester United forward hlui Bebe a ti beidawng bawk.

Hmabak chu

Real Madrid-in La Liga-a an beiseina chhi nung turin hnehna an chang ve leh ta a, an hmabaka inchhawp erawh Club World Cup a ni - Nilaini zan dar 10:00 hian Kashima Antlers nen semifinal an khel dawn.

FIFA hnuaia khawmualpui hrang leh inelna thlengtu ram champion-te intumna ṭhinah hian Real Madrid hi Champions League champion an nih avanga inlan tur an ni a, Japanese club Antlers hi Asian champion an ni thung.

Semifinal inkhel dangah South American champion River Plate chuan Al Ain an hmachhawn dawn bawk a, Al Ain hi inelna thlengtu UAE club an ni a, an ram league-ah an champion avangin Club World Cup-ah hian an inlan.

Club World Cup final hi December 22-ah khelh tur a ni dawn a, Real Madrid hian final an lut emaw lut lo emaw tun season bikah chuan league match an khel tawh lo ang.

300 = Not Out!

Atletico Madrid forward Griezmann chuan La Liga-a match 300 a khelh tlin zanah ropui takin a lawm a, Real Valladolid lakah 3-2 a hnehna changin goal hnih a khung a, assist vawi khat a nei bawk.

Atletico tan Nikola Kalinic chuan minute 26-na lekah goal hmahruai a khung a, Griezmann siamsak a ni. First half hun pek belhah French forward hian penalty aṭangin a khung ve leh a, awlsam takin an chak dawn niin a lang.

Mahse, Atletico inrin loh karah Valladolid an parvul a, Fernando Calero chuan minute 57-naah si phurh sut ṭhenin minute ruk hnu lawkah Saul Niguez chuan an lamah a ti lut chhunzawm zat bawk.

Minute 80-na a ni a, Griezmann bawk kan hmu nawn - Lionel Messi leh Ronaldo te nen huang khata an awm tawh thu sawitu forward hian an goal thumna a khung a, Atletico chakna a ni zui nghal bawk.