MPL7 Top scorer a la chiang lo!

Mizoram Premier League Season 7-ah final chauh khelh tur a awm tawh a, Chhinga Veng forward MS Dawngliana leh Mizoram Police forward Lalfakzuala ten goal riat ve ve an khung.

Goal khung zat inangah minute khel tlem zawk hnehah lawmman pek tur a ni a, tun dinhmunah Bawngkawn tlangval Dawngtea hian minute 1170 khelin, a elpui Lalfakzuala hian minute 1206 a inlan thung. Chhingcows forward Dawngtea hian final-ah a inlan a, minute 36 a khel tlin a, goal a khung si loh chuan top scorer a ni dawn lo - top scorer tur zawnna hi final tingaihnawmtu pakhat a ni ang.

MPL hmasa berah Dawngtea hian Chanmari tan goal 10 khungin top scorer a ni tawh a, MPL2 leh MPL3-ah Police forward Lalbiakhlua chuan goal riat leh goal kua khungin top scorer a ni leh a, MPL4-ah F. Lalrinpuia chuan Aizawl FC tan goal 13 khungin tun thlengin season khata goal khung tam ber a la ni reng.

MPL5-ah Chanmari West forward Laldampuia Tochhawng leh Chanmari forward Malsawmfela ten goal 11 ve ve an khung a, minute khel tlem zawk Dampuia hnehah chawimawina hlan a ni. Season liam ta khan tun ṭuma top scorer ni thei dinhmuna ding Fakzuala hian goal 10 khungin he chawimawina hi a vawi khat nan a dawng.

Hming Club Goal
MS Dawngliana Chhinga Veng 8
Lalfakzuala Mizoram Police 8
Lalnunzama Chanmari FC 6
Vanlalthanga Chawnpui 6
David Lalchhuanawma Electric Veng 6
F. Lalremsanga Aizawl FC 5
Alfred Kemah Jaryan Aizawl FC 4
Isak Vanlalpeka Electric Veng 4
Lalliansanga Ramhlun North 4
Laldampuia Chanmari FC 4