Basketball thiam ber Zarkawt BCA
Zarkawt BCA chuan a zawnin Mizoram Super League nomawi an chawi ta. Zirtawpni zan MSL5 final game 3 inkhelah BCA hian Tuikual South chu 82-68 a hnehin best of three series chu 2-1 in an la.
Tualchhung basketball inelna sang berah hian a tir lam season hnihah Khatla TBL an champion zawn a, anni hnuah BCA hi a zawna champion thei hmasa ber an ni a. TKS erawh khel ṭha viau ṭhin mah se a kum zawnin final-ah a vanduai zawkah an ṭang.
Zarkawt BCA thiampuipa Lalrina Renthlei chu Most Valuable Player atan thlan a ni a, Tuikhuahtlang tlangval hian nikum khan BCA champion pui chungin he chawimawina hi a lo dawng tawh bawk
A tirah Anderson
Zarkawt BCA coach Lalruatfela'n semifinal leh final game hmasa an khelh tawhah a player ṭha Cameron Anderson chu bul a ṭantir ngai lo. Final game 3-ah erawh Anderson hi a tir aṭangin a lut a, ani bakah hian Lalrina Renthlei, Lalsangkima, Zonunsanga leh Dennis Lalmuanpuia ten bul an ṭan.
Tuikual lamin game 2-a hnehna an chan let dan an la theihnghilh lo a, assistant coach R. Liansangpuia chuan an match hnuhnung bera bul ṭantu ngai - Desmond Antwine Medder, captain F. Zodinthara, Lalfakmawia, Lalfakzuala leh Lalmuanpuia Renthlei te chu a dah lut leh nghal ṭhawt - chak nawn an tum tih a chiang.
A hmuhnawm
Hawla Indoor Stadium, Republic Vengthlangah BCA lamin bul an ṭan fuh, Dennis-a'n basket nei hmasa berin Anderson-a dunk hmuh tur a awm nghal, a dan pangngaiin Lalrina Renthlei chuan basket a nei nghal bawk - champion lai hian 10-0 in hma an hruai nghal der.
Tuikual South coach Liansangpuia'n boruak thlak a ngai tih a hria, time out hmasa ber lain a naute a fuih. Phengphehlep tan Desmond, Dina, Fakzuala leh Fakmawia ten point neiin 20-22 in quarter hmasa berah an lehthal let thei!
Inkhel a hmuhnawm zui a, quarter hnihna tawp nan second 2.9 chauh a awm tihin TKS lamin ball an chan laiin buzzer a rawn ri! Khawl lam fel lohna vanga buaina awm zeuh chinfel a nih hnuah Phengphehlep lamin ball an nei zui a, basket an nei zui lo; chawlhlawk laiin BCA lamin 53-51 in hma an hruai.
Danglamna
Season hmasa khan tualchhung player hlangin MSL khelh a ni a, team ṭha BCA an champion. Kuminah erawh dan tih danglam niin team zawng zawngin state pawn player an nei vek, mahse court chhungah pakhat bak a lut thei lo, pahnih chhawr rual theih a ni lo.
Team pahnih an inkhel tawh a, kal fal thei an awm bik lo. Tuikual lamin quarter thumna tawp lamah Desmond an hahchawlhtir a, minute thum chhung vel chu Mizo player hlangin an khel.
Phengphehlepin beiseina an neih san vanglai takin Afela'n a thluak a hmang, point nei thei Anderson lachhuakin rebounds la thei Sowkin Shetty a dah lut a, a tisual lo. Shetty hian TSK kaltluang a titawp a, a hunah tak BCA an tho chhuak.
BCA tan a vawi hnih nana Lalrina Renthlei 3-points luh hmangin point 15 zet in an fal a, a tawp thlengin an chungnung tlang. TKS lamin Shashank J Rai an chhawr thei lo an ui vawng vawng ang. Mission Veng Vikings nen an inkhelh ṭuma Player of the Night ni thei Shashank hi hna thila a haw vangin league round tir lam bak an chhawr hman lo a ni.
An lawm
MSL champion Zarkawt BCA coach Afela chuan, "A tir aṭanga min hruaitu Pathian chungah kan lawm a, min phatsan ngai lotu fans leh BCA chhungkaw chungah lawmthu kan sawi tak meuh meuh. Tuikual lam kha team ṭha tak an ni a, an tawrh pui hle, an tan hun ṭha a la inherchhuah ve ngei kan duhsak," tiin Vanglaini a hrilh.
A kum zawna pahnihna Tuikual manager Siamtea chuan, "December 16 hian kan club-in kum li a tling chiah a, club naupangte ni chunga kan thlen chinah kan lawm. Kan duh dan vekin thil thleng lo mah se kan beidawng lo a, min thlawptu fans chungah kan lawm takzet bawk," a ti a, inelna buatsaihtu MBBA leh Zonet chungah lawmthu a sawi bawk.
MSL Season 5 Thlirna Tawi
Champion Zarkawt BCA Rs 1,70,000/-Trophy
Pahnihna Tuikual South Rs 90,000/-
Pathumna Khatla TBL Rs 45,000/-
Palina Mission Veng Vikings Rs 40,000/-
Pangana Zarkawt Serpents Rs 30,000/-
Parukna BC Bethlehem Rs 25,000/-
Mimal Lawmman
Most Valuable Player Lalrina Renthlei, Zarkawt BCA
Defensive Player Desmond Medder, Tuikual South
Rookie R. Lalrinawma, Zarkawt Serpents
Fairplay Mission Veng Vikings
Champion Kalkawng
League Round
BC Bethlehem 66 - 80 BCA
BCA 98 - 88 TBL
BCA 72 - 56 Serpents
BCA 80 - 83 Vikings
Tuikual South 82 - 89 BCA
Semifinals
Game 1 : BCA 94 - 83 Vikings
Game 2 : Vikings 55 - 90 BCA
(BCA hian series 2-0 in an la)
Finals
Game 1 : BCA 100 - 77 TKS
Game 2 : TKS 95 - 93 BCA
Game 3 : BCA 82 - 68 TKS
(BCA hian series 2-1 in an la)