Juventus rorelna a nghing mek

Zanin aṭangin Serie A khelh chhunzawm a ni leh tawh dawn a, champion lai Juventus-in a zawna a vawi kua nan nomawi chawi an tumna chu dinhmnun derthawngah a ding mek - league match khelh hmabak 12 an la nei.

Table hmahruaitu Old Lady leh pahnihna Lazio inthlauhna chu point khat chauh a ni a, European league lian ho zingah chuan nomawi inchuh team inhnaih ber a ni, coronavirus len hma aiin len hnuah a boruak a sang zualin a rinawm.

Italian club lian pahnih hi tun season bikah vawi hnih an intawng tawh; Serie A leh Italian Super Cup-ah Lazio an chak ve ve. Ruahman dan chuan July 21 hian Turin khawpuiah league match khel turin an intawng leh ang.

March thla chawhma lam aṭang khan Italy rama football inelna zawng zawng chu coronavirus vanga chawlh lailawk vek a ni a, khel ṭha tluang tak Lazio tan chuan hripui leng khan an kaltluang lai a tih tawpsak angah a ngaih theih.

Simone Inzaghi naute hi inkharkhip hma an match hnuhnung 18-ah tlawm an nei lo, match 16 zetah hnehna an chang. 100% chak record ni em em lo mah se hetiang baka ṭha chuan a kal theih loh tluk a ni a, an boruak ṭha hi neih chhunzawm an tum ang.

Juventus erawh season kal laiah an khelh dan a ngelnghet tawk lo. February thla khan table mawngphah lama talbuai lai SPAL chu 2-1 in an hneh hram a, chawlh an neih hma an match hnuhnung berah Inter Milan 2-0 a hnehin an dinhmun an siamṭha hram.

Maurizio Sarri kaihhruaina hnuaiah hma hruai mek mah se tun hma angin league an thunun tawk lo. Chutihrualin Serie A-ah chuan Juventus an champion leh ṭhin a, season hmasa lamah pawh Napoli nen an inum viau nachungin a tawpah erawh Turin club bawk an dingchang. 

Serie A bikah chuan Lazio an champion hnuhnung ber chu season 10 liam ta daih tawh kha a ni, nomawi an chawi loh karah hian tuna an elpui Juve erawh team hlawhtling ber an ni thung - tawnhriat an in ngah hleih hle ang tih a chiang.

League nomawi an chawi hnuhnung bera an player pawimawh chu Diego Simeone, Alessandro Nesta leh Pavel Nedved te an ni. Simeone hi Atletico Madrid manager hlawhtling a ni tawh a, Nedved pawh Juve tana a khelh zawh hnuah club thuneitu a ni leh tawh.

Rin hlawh lo zawk ni chungin nomawi chawi an beisei mek a, an ban phak maiah pawh a awm. January thla khan Lazio midfielder Sergej Milinkovic-Savic chuan, "Hringnunah hian thil chiang pahnih a awm, thihna leh Lazio an beidawng ve ngai lo tih hi a ni," tiin instagram-ah a lo ziak tawh.

Beiseina, tunruhna leh huaisenna nen Juventus an um mek a, an elpui hi season riat chhung a zawna champion thei an nih avang leh squad chhah zawk an nih miau avangin Inzaghi naute hian 'vanneihna' an mamawh tel - vannei turin an thawhrim zual a ngai bawk.

Serie A player zinga mipui ngaihven ber chu Cristiano Ronaldo a ni a, Portuguese forward hi a huhang lian viau mah se goal khung hnem lamah erawh tluk loh a nei - a hming chu Ciro Immobile a ni.

Season kal laiah Italian forward hian tun season league match 26 a khelhah goal 27 a khung thei a, hri leng vanga an chawlh hma kha chuan European league lian zinga goal khung hnem ber a ni. Tunah erawh Robert Lewandowski-a'n (31 goals) a rawn khum tawh.

Kum 30 mi Immobile hian theihna a nei sang a, 2019 khan a club hi Coppa Italia leh Super Cup a lak pui tawh. Lazio tan hian Serie A a hlawh chhuak leh thei a nih chuan an club player ropui bik zingah a awm kumkhua tawh ang.

Juve chhuanvawr Ronaldo hi kum 35 mi a ni tawh a, match zawng zawnga inlan chi a ni tawh lo - league match 22 a khelh aṭanga goal 21 khung hi a chhe lo. Mahse, Turin club hian league an thunun theih rih loh miau avangin a hna thawh hian fak a hlawh tawk lo.

Real Madrid forward hlui hi a kum tam deuh tawh mah se a theihna a la sang a, a club in hun pawimawh a hmachhawn chhoh mek lai hian tun hma ang khan 'changtupa' a rawn ni leh thei ang em tih chu zawhna awm a ni a, a chhanna kan hmu thuai dawn.