Hmalam thlir a ngai - Arteta

Arsenal manager Mikel Arteta chuan Manchester City lakah an chanchin ṭha lo tak chu theihnghilhin, an hma hun thlir a pawimawh zawk thu a sawi - zanin dar 7:30 hian Brighton an lenchilh zui nghal ang.

Covid-19 hnua an match hmasa berah Gunners hi 3-0 in an chak lo, defender David Luiz hnawhchhuah a ni. Midfielder Granit Xhaka leh defender Pablo Mari ten hliam an tuar, hlawh hnem ber Mesut Ozil chu squad-ah a tel lo; chanchin ṭha lo an ngah hle.

Arteta chuan, "Kan boruak tawn kha theihnghilh nghal chu a harsa hle, mahse hriat reng loh a ṭha. Harsatna kha a indawtin a thleng miau a, tumah dem tur bik an awm lo. Tunah erawh Brighton kan hmachhawn tur chauh kan ngaihtuah tawh ang.

"A sang pali zinga kan tel phak dawn leh dawn loh hi zawhna ka dawng hnem, keini chuan match pakhat atan chauh zel rilru kan seng ang," a ti. Ozil nen an boruak a ṭhat thu a sawi a, a theihna sang ber a hlan theih hunah a chhawr tur thu a sawi bawk.