Bengaluru lakah FC Goa an 'comeback'

Pathianni zan Indian Super League inkhel hmuhnawmah FC Goa-in Bengaluru lakah goal hnih chhuah hmasa zet mah se an si phurh an sut zo a, 2-2 in inkhel an ṭin. 

Thai football-a hming lo chher tawh Cleiton Silva-a'n Indian football-ah pawh hming a lo chher tawh tih pholangin minute 28-naah goal hmahruai a khung a, Spanish defender Juanan chuan minute 57-naah a belhchhah. 

Bengaluru-in chak turah an inngai tawh a, mahse Spanish coach Juan Ferrando-a'n Goa tan thutlukna pawimawh a siam - minute 57-naah Brandon Fernandes a luhtir a, Goan midfielder hian inkhel hmelhmang a thlak danglam. 

Brandon-a luh hnuah Goa an hmuhnawm sawt a, Athletic Bilbao striker hlui Igor Angulo chuan minute 66-na leh 69-naah si phurh a rawn sut zo - goal hnih luh nan Brandon Fernandes chuan tha a thawh ve ve.

FC Goa-in Mizo player kawl an nei lo a, Bengaluru Mizo player zingah Lalthuammawia Ralte chuan bench lamah hun a hmang tluan a, Joe Zoherliana, Emanuel Lalchhanchhuaha leh Edmund Lalrindika te squad-ah hmuh tur an la awm rih lo thung. 

Zanin dar 7:30-ah Jam-shedpur FC leh Chennaiyin FC an inkhel dawn a, club pahnihin Mizo player an kawl ve ve. Jamshedpur-ah hian Isaac Vanmalsawma, Laldinliana Renthlei, Ricky Lallawmawma leh William Lalnunfela te an awm. 

Mizo player-te hi tawnhriat nei ṭha vek an nih avangin Jamshedpur-ah hmun pawimawh an chang tura beisei a ni a, Isaac chuan, "Inhliam emaw harsatna dang tawk kan awm rih lo. 

"Chennaiyin kan huphurh hran lo a, inkhelh a châkawm tawh khawp mai," tiin Vanglaini a hrilh a, Mizo player-te inkhel tura an inpeih tawh thu a sawi. 

Jamshedpur hi season hmasaa Chennaiyin thlak danglamtu Owen Coyle enkawlna hnuaiah an khel a, season hmasa ISL-a goal 15 khunga assist vawi ruk neitu Nerijus Valskis chu Chennaiyin aṭangin an lalut bawk. 

Chennaiyin-ah Mizo pathum, Jerry Lalrinzuala, Lallianzuala Chhangte leh Lalchhuanmawia Fanai te an awm a, South Indian club-a hmun pawimawh chang phak ṭhah tura ngaih an ni. ISL Emerging Player of the League (2016) Jerry hian Chennaiyin ni lo, club dang tan ISL-a la khel ngai lo a, he defender hi a hmuhnawm leh dawn. 

Lianzuala hian season hmasa ISL-ah khan match 21 khelin goal sarih a khung a, Indian player zingah goal khung tam lama a tluk loh awmchhun chu Sunil Chhetri (9 goals) chiah niin en bik a hlawh leh ang. 

Chhuantea'n season khat khel turin Chhenaiyin a zawm a, Lengpui defender hi Mumbai City, Pune City leh Odisha FC tan pawha lo khel tawh a ni a, a tawnhriat ringawt pawh hi ṭangkaipui tham a tling dawn. 

Romanian-Hungarian coach ṭha Csaba László chuan Chennaiyin hi a enkawl a, Ligue 1, Primeira Liga leh Scottish Premiership thlenga hming lo chher tawh striker Esmael Goncalves leh Slovakia tana vawi ruk inlan thei Jakub Sylvestr-te chet ṭhat hi a pawimawh ang.